“Görünür, şantajla bizdən pul qoparmaq niyyətindədir” - QALMAQAL

5-01-2019, 11:46           
“Görünür, şantajla bizdən pul qoparmaq niyyətindədir” - QALMAQAL
“ALKE İnşaat və Sənaye” ASC ( indiki adı "AKELİK GROUP"ASC) sabiq əməkdaşı Şahin Cəfərovun və “Azərsu” ASC-nin sifarişi ilə adıçəkilən şirkətin icra etdiyi “Xaçmaz şəhərinin su təchizatı və kanalizasiya sistemlərinin yenidən qurulması” layihəsinin sabiq topoqrafı Ramazan Biçerin bizə təqdim etdiyi, sənəd və fotolarda öz təsdiqini tapan faktlar əsasında araşdırmamız davam edir.

Ötən yazılarımızda Şahin Cəfərovla Ramazan Biçerin sözügedən şirkətin işindəki nöqsanlar, eləcə də 6,5 milyonluq yeyinti faktı ilə bağlı fikirlərini sizə çatdırmışdıq. Bu dəfə isə “ALKE İnşaat və Sənaye” ASC–nin (indiki adı "AKELİK GROUP"ASC) hüquqşünası Ramiz Nuriyevin mövqeyini öyrənməyə çalışdıq. Daha doğrusu, R.Nuriyev redaksiyamıza zəng vurub bizi şirkətin ofisinə dəvət etdi ki, gedib yerində araşdırma aparaq.

“Qoy bizi məhkəməyə versinlər, yol verdiyimiz qanunsuz əməllərə görə qanun qarşısında cavab verək”

Ramiz Nuriyevin əməkdaşımıza söylədiklərini olduğu kimi təqdim edirik:

“Sizi ofisimizə dəvət etməkdə məqsədimiz adıçəkilən məsələ ilə bağlı mövqeyimizi bildirməkdir. Zənnimizcə, qəzetinizdə şirkətimizlə bağlı dərc etdiyiniz yazılar birtərəflidir.

Məqalələrdən birində Banu Oğuz yazır ki, telefon danışığı zamanı səsimdəki təşviş açıq-aydın hiss olunurdu. Halbuki, təşvişə düşmək, yaxud qorxmaq üçün heç bir səbəbim yoxdur. Heç bir qanunsuz iş görmürəm, o üzdən heç bir narahatçılığım da yoxdur. Şahin Cəfərovla da, mətbuat nümayəndələri ilə də istənilən vaxt görüşüb söhbət etməyə və müvafiq sənədləri təqdim etməklə məsələyə aydınlıq gətirməyə hazıram.

Şirkətimizin sabiq əməkdaşı Şahin Cəfərova gəldikdə isə, onun işdən çıxarılmasında heç bir qanunsuzluğa yol verilməyib. Biz onunla xidməti müqavilə imzalamışdıq. Layihənin vaxtı başa çatdıqda da onunla haqq-hesab edib həmin müqaviləyə xitam verdik. Şahin Cəfərov sizinlə müsahibəsində layihə bitməmiş kobud şəkildə işdən qovulduğunu qeyd edib. Onun bu fikri həqiqətə uyğun deyil.

Bir də ki, istənilən şirkət, yaxud idarədə müxtəlif səbəblərdən əməkdaşla əmək müqaviləsinə, yaxud xidməti müqaviləyə xitam verilə bilər, həmin əməkdaşın keçmiş iş yeri və rəhbərliklə bağlı hansısa şikayəti, yaxud iradı da ola bilər, bu tamamilə normal haldır. Amma həmin şikayət və iradları ilk olaraq işlədiyi şirkətə bildirməlidir. O, bu günə qədər bizə rəsmi qaydada müraciət etməyib. Əgər müraciət etsəydi, hökmən onu qəbul edib dinləyərdik.

Başqa bir tərəfdən, əgər Şahin Cəfərovla Ramazan Biçer şirkətimizin işindəki qanunsuzluqları sübut edəcək faktlara sahibdirlərsə, nədən hüquq mühafizə orqanlarına deyil, qəzetə müraciət edirlər? Biz hüquqi dövlətdə yaşayırıq. Qoy bizi məhkəməyə versinlər, yol verdiyimiz qanunsuz əməllərə görə qanun qarşısında cavab verək.

Şahin Cəfərov notarial qaydada ərizə yazıb və bildirib ki, şirkətimizdən heç bir şikayəti yoxdur, gələcəkdə də olmayacaq.

Şahin Cəfərov sizinlə müsahibəsində özünü qanunlardan xəbərdar bir şəxs kimi təqdim edir, üstəlik Ramazan Biçerin hüquqlarını müdafiə etməyə hazır olduğunu da bildirir. Əgər bu insan həqiqətən belə məlumatlıdırsa, öz hüquqlarını bilirsə və onları müdafiə etmək iqtidarındadırsa, onu şikayət ərizələrini geri götürməyə, yaxud saxta müqavilə imzalamağa necə məcbur etmək olardı?

Bu gün əksər müxbir və qəzetçilər nədənsə belə düşünür ki, ölkədə fəaliyyət göstərən bütün şirkətlər, dövlət qurumları xalqın düşmənidir, burda çalışanlar xalqın pulunu yeyir. Kimsə həmin qurumlardan şikayət edirsə, haqlı tərəf odur. Hesab edirəm ki, bu tamamilə yanlış fikirdir.

Baxın, şirkətin sabiq əməkdaşı Şahin Cəfərov notarial qaydada ərizə yazıb və bildirib ki, şirkətimizdən heç bir şikayəti yoxdur, gələcəkdə də olmayacaq. İndi o gündə bir fikrə düşəcək, bu gün ərizə verəcək, sabah gedib həmin ərizəni ləğv etdirəcək, siz də o adam haqqında geniş məqalələr yazıb şirkətimizin imicinə zərbə endirəcəksiniz?

Əslində, bütün bu məsələlər birbaşa məhkəmə predmetidir. Ağlı başında bir insan notarial qaydada ərizə yazır, üç ay sonra isə fikrini dəyişir, yazdıqlarını təkzib edir, təhdid edildiyini bildirir və əvvəlki ərizəsini ləğv etdirir... Sizi bilmirəm, şəxsən mən bunu demaqoqiya adlandırıram. Sizin qəzet də hansısa demaqoqun fikri ilə bizim şirkətimizin işgüzar nüfuzuna xələl gətirən silsilə yazılar dərc edir.

“Adıçəkilən layihələrin icraçısı biz yox, Türkiyənin Alke İST AŞ şirkətinin Azərbaycan filialıdır”

Daha bir məsələyə aydınlıq gətirmək istəyirəm. Şahin Cəfərovla Ramazan Biçer bizim şirkəti Xaçmaz və Zərdab layihələrinin icraçısı kimi təqdim edir və bizi dövlətin pulunu mənimsəməkdə günahlandırır. Əvvəla, qeyd edim ki, adıçəkilən layihələrin icraçısı biz yox, Türkiyənin Alke İST AŞ şirkətinin Azərbaycan filialıdır. Həmin şirkətin bizim şirkətlə heç bir əlaqəsi yoxdur. Onun öz rəhbərliyi, öz VÖEN nömrəsi var, biz sadəcə işgüzar tərəfdaş olmuşuq. Öz ofisimizdə onlara otaq da vermişdik, o üzdən ünvanımız eyni idi. Həmin şirkətin əməkdaşlarını tanımağımız da təbiidir. Özü də biz büdcə təşkilatı deyilik ki, dövlətin pulunu mənimsəyə bilək.

Şirkətimizin təsisçisi Süleyman Babayevin Ramazan Biçeri təhqir etməsi ilə bağlı heç bir məlumatım yoxdur. Hətta belə bir hadisə olubsa belə, bu Ramazan Biçerlə Süleyman Babayevə aid məsələdir və bizim şirkətimizə heç bir aidiyyatı yoxdur. Ramazan Biçerin Süleyman Babayevlə hansısa problemi varsa, bunu məhkəmədə həll etsin, şikətimizin adını hallandırmasın.

Yeri gəlmişkən, bizdə Ramazan Biçerin də notarial qaydada təsdiqlənmiş ərizəsi var. O da həmin ərizə ilə çalışdığı şirkətə qarşı heç bir iddiası olmadığını bildirir.

Türkiyənin Alke İST AŞ şirkətinin Azərbaycan filialının sabiq əməkdaşının ərizəsinin bizdə olma səbəbinə gədikdə isə qeyd etməliyəm ki, şirkətlərimizin adı oxşar olduğundan və bir müddət eyni məkanı paylaşdığımızdan Alke İST AŞ şirkətinə ünvanlanan məktublar çox vaxt yanlışlıqla bizə çatdırılır, biz də onları həmin şirkətə yönləndiririk.

Onu da deyim ki, Ramazan Biçer Türkiyənin Azərbaycandakı səfirliyinə şikayət ərizəsi ilə müraciət etmişdi, səfirlik Əmək Müfəttişliyindən bu məsələni araşdırmağı xahiş etmişdi. Təbii ki, müfəttişlik də şirkətə məktub yolladı, şirkətdən Ramazan Biçerin qeyd etdiyim ərizəsinin surəti müfəttişliyə, müfəttişlikdən isə səfirliyə göndərildi və mövzu bağlandı.

“Nə Şahin Cəfərovu, nə də Ramazan Biçeri heç kəs zor gücü ilə, başına tapança dirəyib hansısa sənədə qol çəkdirməyib, onlarin hər ikisi bunu öz xoşları ilə ediblər”

Biz demokratik dövlətdə yaşayırıq. Bizim ölkədə hər bir vətəndaşın hüquqları qorunur. Təbii ki, bəzən məmur özbaşınalığı ilə də üzləşirik, amma ümumilikdə qanunlar işləyir.

Bir də ki, nə Şahin Cəfərovu, nə də Ramazan Biçeri heç kəs zor gücü ilə, başına tapança dirəyib hansısa sənədə qol çəkdirməyib, onlarin hər ikisi bunu öz xoşları ilə ediblər. Özünüz düşünün, onlar çalışdıqları şirkətlərdən əmək haqlarını almasaydılar, belə bir ərizəyə imza atardılarmı? Mən əminliklə “atmazdılar” deyirəm.

Ümumiyyətlə, şirkət daxilində mümkündür ki, bir insanı hansısa bir vəzifəyə təyin edəsən, sabah başqa bir sahədə sənə lazım olar, baxarsan ki, işi bilir, kompüterdə işləməyi bacarır, deyərsən ki, hələlik bu işlə məşğul ol. Necə ki, Şahin Cəfərova Hacıqabul layihəsində müvəqqəti maliyyəçi işi tapşırılmışdı. Bunda qəbahətli heç bir yoxdur.

Şahin Cəfərov iddia edir ki, mən Xaçmaz layihəsinin icraçılarına əmək haqqı paylamışam. Amma belə bir şey olmayıb. Mənim ümumiyyətlə o layihə ilə heç bir əlaqəm olmayıb. Hacıqabulda da Şahin Cəfərovun dediyi kimi 7 dəfə deyil, vur-tut 2 dəfə olmuşam.

Şahin Cəfərovun haqqında danışdığı Hacıqabul layihəsi əslində şirkətimiz tərəfindən şəxsi sifariş kimi icra edilib. Materialı da sifarişçi verib. Biz isə öz texnikamızdan, işçi qüvvəmizdən istifadə edərək həmin layihəni həyata keçirmişik. Dediyim odur ki, bu layihə dövlət sifarişi deyil. Bir aya yekunlaşmalı olan layihə müxtəlif səbəblərdən bir ilə yaxın çəkdi. Kənd yeridir, orda bankomat tapmaq müşkül məsələdir, o üzdən məcbur olub işçilərə əmək haqlarını nəğd pulla paylamışıq. Bu məsələni bu qədər şişirtmək nəyə lazım idi axı?

“Bu cür hərəkətlər şirkətimizin işgüzar nüfuzuna xələl gətirir, burda çalışan 500-ədək əməkdaşı işsiz qalmaq təhlükəsi ilə üz-üzə qoyur”

Bir daha qeyd edirəm ki, bu gün biz "AKELİK GROUP"ASC kimi fəaliyyət göstəririk. Nizamnaməmizdə deyilir ki, "AKELİK GROUP"ASC “ALKE İnşaat və Sənaye” ASC-nin hüquqi varisidir. O üzdən şirkətin adı dəyişsə də, VÖEN nömrəsi əvvəlkidir.

Süleyman Babayev şirkətimizin baş direktoru deyil, səhmdarı, təsisçisidir, idarə heyətinin sədri Madar Quliyevdir, biz isə heyət üzvləriyik( baş direktor ştatı isə ümumiyyətlə yoxdur).

Dediyim odur ki, şirkətimiz mülki məcəlləyə əsasən idarə olunur. Həmçinin bizim də öz nizamnaməmiz var və şirkətimizin işi həmin nizamnaməyə əsasən tənzimlənir. Biz öz işimizdə heç bir qanunsuzluğa yol vermirik. Bütün əməkdaşlarla əmək müqaviləsi bağlanıb, əmək haqları da bank hesablarına köçürülür. Layihələrin icrası üçün pul ayıran banklar ayrılan vəsaitin necə və hara xərcləndiyinə ciddi şəkildə nəzarət edir. Şahin Cəfərovun verdiyi yanlış məlumatlarsa sadəcə su bulandırmaqdır. Görünür, şantajla bizdən pul qoparmaq niyyətindədir.

Onu da vurğulamaq istəyirəm ki, sizə təqdim edilən boru və quyu fotoları əslində istintaq üçün sübut sayıla bilməz. Çox adam çox şəkil çəkə bilər. Bir də ki, istehsal prosesində müəyyən əyər-əskiyin, nöqsanların olması adi haldır. Amma iş prosesində bütün bu nöqsanlar aradan qaldırılır.

Bizim şirkət ölkədə qeyri-neft strukturunun inkişaf etdirilməsi istiqamətində əməli fəaliyyət göstərir. Bu cür hərəkətlərsə, artıq qeyd etdiyim kimi, şirkətimizin işgüzar nüfuzuna xələl gətirir, burda çalışan 500-ədək əməkdaşı işsiz qalmaq təhlükəsi ilə üz-üzə qoyur”.
Hurriyyet.org












Teref.info © 2015
E-mail: [email protected]            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.