Səudiyyə Ərəbistanı yenidən keçən ilin oktyabrında İstanbul konsulluğunda vəhşicəsinə qətlə yetirilən jurnalist Camal Qaşıqçı cinayətinin müstəqil araşdırma ilə çözülməsi çağırışlarını rədd edib.

Fransanın AFP agentliyinin məlumatına görə, BMT-nin İnsan hüquqları üzrə Şurasının Cenevrədəki iclasında çıxış edən Səudiyyə Ərəbistanı rəsmisi Bəndər Əl-Ayban ölkəsinin “bu dəhşətli cinayətin üstünün açılması üçün əlindən gələni etdiyini” söyləyib.

Səudiyyə Ərəbistanın İnsan haqları üzrə komissiyasına da rəhbərlik edən Bəndər Əl-Ayban bu hadisənin “beynəlmiləlləşdirilməsi” ilə bağlı istənilən çağırışı ölkənin daxili işlərinə qarışmaq kmi dəyərləndirdiklərini bildirib.

Qeyd olunur ki, Səudiyyə nümayəndəsinin çıxışı 36 ölkənin Camal Qaşıqçı cinayətinin beynəlxalq təhqiqata verilməsi ilə bağlı tələbindən sonra baş tutub.

Ayban “bədbəxt hadisə” adlandırdığı bu insidentin Ər-Riyadı “dəhşətə saldığını” vurğulayıb. Onun sözlərinə görə, bu işdə şübəli bilinənlər ədaləti şəkildə mühakimə ediləcəklər.

Bundan başqa, Səudiyyə Ərəbistanı təmsilçisi beynəxalq təşkilatların, o cümlədən qeyri-hökumət təşkilatlarının təmsilçilərinə məhkəmə prosesini izləmək imkanını verildiyini desə də, konkret hansı qurumların olduğunu söyləməyib. Lakin bununla bərabər o, Səudiyyə Ərəbistanın beynəlxalq ekspertlərə təhqiqatda yaxından iştirakına icazə verməyəcəyini vurğulayıb.

“Səudiyyə Ərəbistanı suveren dövlətdir. Bu cür tələblər beynəlxalq birliyin bizim məhkəmə aparatı və sistemimizin bütövlüyünü şübhə altında qoymağa bərabərdir”, - deyə Bəndər Əl-Ayban qeyd edib.



Musavat.com