ABŞ prezidentinin milli təhlükəsizlik üzrə köməkçisi Con Bolton Venesuela ordusunu Amerika təyyarəsinə qarşı "təxribatçı hərəkətlər"də günahlandırıb.

"Report" xəbər verir ki, Con Bolton bu barədə öz şəxsi "Twitter" səhifəsində qeyd edib.

Daha əvvəl ABŞ Silahlı Qüvvələrinin Cənub Komandanlığı Venesuelaya məxsus Su-30 təyyarəsinin Amerikanın EP-3 kəşfiyyat təyyarəsini “aqressivcəsinə izlədiyi” barədə məlumat yayıb.

ABŞ rəsmisi onu da bildirib ki, Venesuela ordusunun hərəkətləri Venesuela prezidenti Nikolas Maduronun beynəlxalq norma və qanunların "qəsdən pozulması"na bir nümunədir.

Qeyd edək ki, Venesuelaya məxsus Su-30 təyyarəsinin Amerikanın EP-3-ün ekipajına və təyyarənin özünə ciddi risk yaradıb. Bundan öncə Venesuela ABŞ təyyarəsinin hava sərhədini pozduğunu bəyan edib. İddia edilib ki, təyyarə ilə əlaqə yaratmaq mümkün olmayıb, yalnız Su-30 havaya qalxdıqdan sonra ABŞ-ın kəşfiyyat təyyarəsi uzaqlaşıb.