Dövlət büdcəsindən milyonlar necə yayındırılır... - Və yaxud vergilər naziri vergi cinayətlərinə nə üçün göz yumur?

20-06-2019, 16:20           
Dövlət büdcəsindən milyonlar necə yayındırılır... - Və yaxud vergilər naziri vergi cinayətlərinə nə üçün göz yumur?
Dövlət büdcəsindən milyonlar necə yayındırılır...
Vergi dövlətin bel sütunudur! Bir dövlətin çökməsini istəyənlər üçün vergi sistemini çökdürmək, əsas vergi ödəyicilərinin vergidən yayınmasına şərait yaratmaq yetərlidir. Çox təəssüf ki, bu tendensiya Azərbaycanda çoxdandır davam edir!

Ən dəhşətverici məqam da ondan ibarətdir ki, mətbuatda bu barədə bütün çılpaqlığıyla dəfələrlə yazIımasına baxmayaraq, "vnimaniya nol"-dur. Elə də böyük olmayan məmləkətimizdə hamı bir-birini çox yaxşı tanıyır və nə islərdən çıxdığnı gözəl bilir...

Dövlətin sütunu dediyimiz bu orqana hərə öz çapında baltasını vurmaqdadır. Kimisi fərdi sahibkar qismində, kimisi hüquqi şəxs qismində, kimisi iş adamı, kimisi vəzifəli şəxs qismində, kimisi siyasətci qismində və s. və.i. Mən deyərdim ki, bu qisimlərin ən böyüyü ticarət mərkəzləri, bazarlar qismində fəaliyyət göstərən, dövlətin və millətin mənafeyini düsünməyən, Azərbaycanın ən böyük vergi qaçaqçıları, vergidən yayınan, illik yüz miliyonlarla manat vəsaitin vergiyə daxil olmasının qarşısını alan əsasən haqqında bəhs edəcəyimiz "əjdəha”lardır! “Binə” və “Sədərək” ticarət mərkəzlərinin, eləcə də digər nəhəng bazarların fəaliyyətinə nəzər salsaq və hər kvadratmetr üçün toplanan vəsaitin iyirmi beş, otuz manat təşkil etdiyini və bu miqdarın ay ərzinde əlli milyon (50 milyon) manat civarında olduğunu görərik. “Binə” və “Sədərək” ticarət mərkzlərində işləyən on minlərlə satıcıdan vergi adına əlavə olaraq adambaşına iki yüz qırx manat (240 manat) vergi pulu yiğmaqla, vətəndaşların mustəqil şəkildə vergidə qeydiyyatda durub, özləri öz vergilərini ödəmələrinə imkan verilmir. Bunun nəticəsində on minlərlə iş adamı vergidən kənarda qalır və onlar gələcək sosial təminatlardan da məhrum olurlar.

Vergi adı altinda toplanan vəsaitin əslində vergiyə yox, bazar sahibinin cibinə getdiyini hər bir sahibkar bilsə də, bu amansız axının qarşısında çarəsiz yuvarlanıb getməkdədirlər. Tək təsəlliləri “biz vergimizi veririk, haraya getdiyini DÖVLƏT baba özü maraqlansın” demələridir.

Zaman-zaman öz kiçik etirazlarını bazar rəhbərliyinə bildirən, vergisini özü vermək istəyən satıcılar konkret olaraq bazar rəhbəri tərəfindən şəxsən təhdidlə qarşılaşmış və bazardan qovulmaq təhlükəsiylə üzləşdiklərindən, yekunda “susmaq qızıldır” prinsipini əsas tutublar!

Vergi islahatları ilə gündəmə gələn vergilər naziri də miqyası on milyonlarla ölçülən bu vergi yayınmasından özünü bixəbər kimi aparır və islahatları, yenicə iş həyatına qədəm qoymuş, həyatını ticarətlə qazanmağa çalışan xırda sahibkarların ən kiçik səhlənkarlıqlarını güzəştə getməyərək cəzalandırmaqda və onların iş həyatlarını başlamadan bitirmələrində görür.

Hörmətli vergilər nazirimiz bazar mafiyasi ilə muqayisədə gözə görsənməyən xırda sahibkarların kiçicik yayinmalarını "dəryada böyük balıq" yaxalayıbmış kimi numayiş etdirərək, gözdən pərdə asmaqla, əslində, diqqətləri əsl hədəfdən yayındırmağa çalışır. Belə olmasaydı, susqunluq nümayiş etdirməyib, “bazar mafiyası” ilə bağlı sükutu pozardı!

Bunları deməyə əsas verən səbəb illərdir bazarların milyonları vergidən yayındırdığını mütəxəssislərin mətbuat səhifələrində dəfələrlə gündəmə gətirməsi və bu amansız vergi cinayətinin hələ də davam etməsidir! Bunları görən və dərk edən kiçik sahibkar, sadə vətəndaş da “bir balta da mən vurum” prinsipilə dövlətin əsasına zərbə vurmaqda davam edirlər!

Son verilən məlumatlara gorə, “Binə” bazarının rəhbəri Kəbirə Məmmədova şəxsən satıcılara vergi adına yığılan, yəni adambaşına düşən 240 manatın məbləğini qaldıraraq, iyul ayından beş yüz manat edəcəyini elan edib. Razılaşmayanların taleyi bəri başdan bəllidir! Məncə, bu məsələ vergi nazirinin boyunu aşdığından, cənab Prezident şəxsən müdaxilə etməlidir! Əks təqdirdə illərdir yüz milyonları büdcədən yayındırmaqla mafiyalaşmış bazarlar, elə də iradəli olmayan, pul qarşısında sınmağı özünə şərəf bilən, öz mənfəətini dövlətin mənfəətindən üstün tutan istənilən məmuru bahalı xəz dəri kimi alıb, ayaqları altına salacaqlar! \\hurriyyet.org\\












Teref.info © 2015
E-mail: [email protected]            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.