Prezident İlham Əliyev Davosda Dünya İqtisadi Forumunun “Strateji baxış: Avrasiya” konfransında Azərbaycanda aparılan islahatlar haqqında danışıb. Ölkə başçısı ötən həftə yayımlanan çıxışında Azərbaycanda fevralın 9-na təyin olunan növbədənkənar parlament seçkilərinin nəticələri əsasında formalaşdırılacaq Milli Məclisin yeni tərkibi ölkədə aparılan sosial-iqtisadi islahatların vacib hissəsi olacağını vurğulayıb:



“Yaxın aylarda biz əhaliyə etimad göstərdikləri şəxsləri seçmək imkanı vermək üçün növbədənkənar parlament seçkiləri keçirəcəyik. Parlament isə seçkilərdən sonra islahatların çox vacib hissəsi olacaq”, - dövlət başçısı qeyd edib.



Prezident bildirib ki, Azərbaycanda aparılan islahatlar çərçivəsində ölkə hökumətinin tərkibi əhəmiyyətli dərəcədə yenilənib.



Milli Məclisin deputatı Vahid Əhmədov bildirir ki, Azərbaycanda islahatlar davamlı olaraq aparılır:



“Bu bir ayın, bir ilin məsələsi deyil. İlk olaraq, ölkə başçısı məhkəmə-hüquq sistemi ilə əlaqədar fərman verib. Bununla bağlı həmin sistemdə çox ciddi islahatlara ehtiyac var. Orada həm kadr dəyişikliyi getməli, həm digər məsələlər öz həllini tapmalıdır.



İlk dəfə olaraq, Azərbaycanda paralel ekspertiza yaratmağa icazə verdilər. Kadrların dəyişilməsi prosesi isə hələ başa çatmayıb. Bir sıra nazirliklər var ki, kadr dəyişikliyi bu qurumlarda davam edəcək”.



Vahid Əhmədov onu da söyləyib ki, ölkədə köklü islahatların davamı kimi yeni parlament təsdiq olunandan sonra nəzərdə tutulan digər məsələlərə də baxılması məntiqi ardıcıllıqdır:



“Mən hesab edirəm ki, islahatlar davamlı olacaq, heç zaman dayanmayacaq. Zamana uyğun qanunlar, qərarlar qəbul edilir.



Yeni parlament fəaliyyətə başlayandan sonra qanunvericilik sahəsində hansı islahatların aparılacağı barədə isə indidən fikir söyləmək çətindir. Çünki bunun üzərində işləmək lazımdır. Bizim bir neçə qanun layihələrimiz var ki, hələlik qəbul edilməyib. Onlardan biri də “Təhsil kreditləri haqqında” Qanun layihəsidir. Yəqin ki, bu qanun layihələrinə də yeni tərkibdə parlament formalaşdırıldıqdan sonra baxılacaq”.