BAŞÇI MÜAVİNİNİN “OFŞOR SƏLAHİYYƏTLƏRİ”: – BEYLƏQAN İCRA HAKİMİYYƏTİNDƏ İKİTİRƏLİK

26-03-2019, 08:29           
BAŞÇI MÜAVİNİNİN “OFŞOR SƏLAHİYYƏTLƏRİ”: – BEYLƏQAN İCRA HAKİMİYYƏTİNDƏ İKİTİRƏLİK
Azərbaycanda yüksək vəzifəyə təyin olunan şəxsin özünə yeni komanda formalaşdırması çoxdankı ənənədir desək, yanılmarıq. Doğrudur, istisnalar da yox deyildir. Elə şəxslər vardır ki, vəzifə onları deyil, onlar tutduqları vəzifəni qiymətə mindirirlər. Ancaq belə hallar aşağı və orta vəzifələr tutan, əsas etibarilə öz işinin mahir biliciləri sayılan məmur-mütəxəssislərin əvəzsizliyini ehtiva edir. Bəzən də vəzifəli şəxs özünün əsas vəzifəsində heç də əvəzolunmaz sayılmasa da, daşıdığı ikinci, qeyri-rəsmi vəzifədə məharətlidir.

Son illər Beyləqan rayon rəhbərliyində baş verən kadr dəyişiklikləri yuxarıda qeyd etdiyimiz tendensiyaları müşahidə etmək üçün əsl nümunədir. Rayon İcra Hakimiyyəti (RİH) başçısının müavini – RİH-nin Sosial-iqtisadi inkişafın təhlili və proqnozlaşdırılması şöbəsinin müdiri Məhəmməd Qələndərov da bu mənada "əvəzolunmaz” kadrdır. Məsələ burasındadır ki, Asif Ağayev RİH-nə başçı təyin olunandan sonra sələfi Vaqif Abdullayevin kadrlarının işdən kənarlaşdırılmasına nail oldu: Aytən Mirzəyeva RİH-nin İctimai-siyasi və humanitar məsələlər şöbəsinin müdiri (RİH başçısının müavini) vəzifəsindən, Xuraman Rüstəmova rayon Təhsil şöbəsi müdirliyindən, Əliyar Həsənov Yaşıllaşdırma İdarəsinin rəisi postundan təmtəraqsız yola salındı. Amma Asif Ağayevin daha əvvəlki icra başçısı İrşad Əliyevin hakimiyyəti dönəmində "qara vəzir” kimi tanınan Məhəmməd Qələndərova gücü çatmadı. Bildirildiyinə görə, Qələndərov məhz hələ də hadisələrin gedişinə təsir imkanlarını saxlayan keçmiş kənd təsərrüfatı naziri İrşad Əliyevin və sabiq baş nazir Artur Rasizadənin himayədarlığı sayəsində möpvqeyini əldə saxlamağı bacardı.

Bu əsnada Beyləqandan verilən məlumatlarda bildirilir ki, Məhəmməd Qələndərov hələ ki, özü ilə birgə hamilik etdiyi, gəlirli hesab olunan, korrupsiya üçün əlverişli mühit sayılan sahələri də öz kurasiyasında saxlaya bilir.

Başqa bir ilginc məlumat isə Məhəmməd Qələndərovun RİH başçısının birinci müavini Telman Məstanovun vəzifədən alınmasına nail olmaq və onun postuna yiyələnmək üçün əl altdan kampaniya aparmasıdır.

Etibarlı mənbədən aldığımız məlumata görə, Qələndərovun bu niyyəti onun özünün onsuz da böyük olan səlahiyyətinin gəlirlərinin artırmaq istəyindən daha çox məhz toxunulmazlığını qorumaq istəyinə xidmət edir. Çünki "Yerli İcra Hakimiyyətləri haqqında” Əsasnaməyə görə, icra başçılarının birinci müavinlərini icra başçıları özləri deyil, Azərbaycan Respublikasının Prezidenti təyin edir (Rayon, şəhər və şəhər rayonu icra hakimiyyəti başçısının ikinci dərəcəli müavinləri isə Azərbaycan Respublikası Prezidenti İcra Aparatının rəhbəri ilə razılaşdırılmaqla müvafiq icra hakimiyyəti başçısı tərəfindən vəzifəyə təyin və vəzifədən azad edilirlər). Belə olan halda A.Ağayevin də M.Qələndərova təsir imkanları azalmış olar.

Bütün bu qeyd olunanlar belə düşünməyə əsas verir ki, yeni başçı Asif Ağayevin Beyləqan RİH başçısı vəzifəsində həyata keçirməyi nəzərdə tutduğu işlərin arzuolunan səviyyədə həyata keçməsi, Beyləqana və beyləqanlılara fayda verəcəyi sual altındadır.

P.S. Artıq 10 ildir ki, Beyləqanda büdcə maxinasiyalarını M. Qələndərov həyata keçirir. Bİldirilir ki, Qələndərov Beyləqanın abadlaşmasına ayrılan dövlət vəsaitlərini isə, «Murad-Elmir» MMC, «Təmir-Tikinti» LTD, «Mirdamət-2008» MMC, «İlkin –İM» MMC və digər yeni yaradılmış müəssisələr vasitəsi ilə mənimsəyir.

RealMedia.az












Teref.info © 2015
E-mail: [email protected]            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.