Lerik Rayon Mədəniyyət və Turizm Şöbəsinin müdiri Aqil Sucayev işçiləri kütləvi şəkildə işdən azad edib.

Rayondan Arqument.Az-a daxil olan ilginc məlumata görə, Aqil Sucayev Mədəniyyət və turizm şöbəsində çalışan işçilərə ərizə yazdıraraq onları iki ay müddətdində işdən çıxarıb. Sucayev bildirib ki, şöbənin müvafiq qurumlarında işləyən şəxslər sentyabr ayında yenidən işə götürüləcək. İşdən çıxarılanlar mədəniyyət idarələrində, klublarda, turizm şöbələrində, kitabxanalarda və s. çalışanlardır.

Şikayətçilər bildirir ki, bu qanunsuzluğa etiraz edənlərə Sucayev tapşırığın nazir tərəfindən verildiyini deyib: "Bizi işdən çıxarmaqla iki ay alacağımız məzuniyyət pulunu mənimsəmək istəyirlər. Bu işdə Aqil Sucayev rayonun icra başçısı Rövşən Bağırov və başçının birinci müavini Cəlil Baxşıyevlə əlbirdir. Amma Aqil müəllim tapşırığın nazir tərəfindən verildiyini deyir. Bu hadisə rayonda ilk dəfədir ki, baş verir. Biz müvafiq qurumlara, nazirliyə, Prezident Adminstrasiyasına müraciət edəcəyik. Məsələ ondadır ki, biz şikayət edəcəyimizi dedikdə Aqil Sucayev və İcra Hakimiyyəti tərəfindən təzyiqlə üzləşirik. İcra Hakimiyyətinə etdiyimiz şikayətlərə qətiyyən baxmırlar. Bizi hədələyirlər, deyirlər ki, hara istəyirsiniz şikayət edin. İcra başçısının köməkçisi Zamiq Əhədov deyir ki, hara şikayət edəcəksiniz, mətbuat da dostumuzdur. Cəlil Baxşıyev ümumiyyətlə Leriki talan eləməklə məşğuldur. Rövşən Bağırovun isə icra başçısı olub-olmadığı bəlli deyil".

Şikayətçilər hesab edirlər ki, nazirlik və şəxsən nazir Əbülfəs Qarayev bu məsələni nəzarətinə götürüb araşdıracaq: "Ümid edirik ki, cənab nazir bu məsələni araşdırıb səsimizə səs verəcək. 100 manat maaş alırıq, onunla dolana bilmirik. Artıq indi onu da əlimizdən alırlar. Kim zəmanət verir ki, bizi iki aydan sonra yenidən işə bərpa edəcəklər? Yəqin ki, iki aydan sonra çağırıb deyəcəklər ki, gətirin pul verin sizi işə götürək".

Müraciətdə bildirilir ki, şöbə müdiri Aqil Sucayev bu ilin yanvar ayında onlarla klubu və mədəniyyət idarəsini bağlayıb, 50-dən çox işçini ixtisar edib: "Bizdən əvvəl də belə elədilər. Bir neçə klubu və mədəniyyət idarəsini bağladılar. 60 nəfərə yaxın işçini ixtisar elədilər. Kitabxanalar bağlandı, idarələr klub səviyyəsinə endirldi. Xeyli ştat ləğv olundu. Sonra ixtisara düşən şəxslərdən 1000 AZN rüşvət istədilər ki, işə bərpa etsinlər. 100 manat maaş alan şəxs 1000 manat necə verə bilər? Deməli, o, 1 il işləməlidir ki, Aqil Sucayevə verdiyi pulu ödəsin. Hazırda rayonda anarxiya və məmur özbaşınalığı baş alıb gedir. Xahiş edirik ki, bizə yardım edin, qoy səsimizə səs verən tapılsın".

Arqument.Az olaraq Mədəniyyət və Turizm Nazirliyinə müvafiq sorğu göndərmişik. Rayon mədəniyyət və turzim şöbəsinin müdiri Aqil Sucayevlə əlaqə saxlamaq mümkün deyil, zənglərə cavab vermir. İcra Hakimiyyəti isə bu məsələni araşdıracağını deməklə uzun zamandır məsuliyyətdən yayınmağa çalışır.

Qeyd edək ki, baş verənlərlə bağlı kifayət qədər faktlar var. Araşdırmalarımız davam edir. Hadisənin geniş təfərrüatını dərc edəcəyik.