Vaşinqton Ukraynadan sonra Ermənistan, Qırğızıstan və Özbəkistanda qeyri-stabillik ovuna çıxıb, bununla da Rusiya ətrafında təhdid çevrəsini qapatmaq istəyir.

Virtualaz.org xəbər verir ki, bu barədə nüfuzlu amerikalı analitik, Reyqan administrasiyasında işləmiş, sonralar “The Wall Street Journal”, “Businesweek” kimi nəşrlərin baş redaktoru olmuş Pol Kreyq Roberts “Personal Liberty” portalında dərc edilmiş məqaləsində yazıb. Analitik hesab edir ki, Vaşinqton bununla da kifayətlənməyib Azərbaycanı da rəngli inqilabların hədəfi kimi nəzərdən keçirir. Amerikalı analitikin məqaləsinin xülasəsinə Rusiyanın “Voennoe Obozrenie” (“Hərbi İcmal”) nəşri yer verib. Bu nəşr Rusiya Müdafiə Nazirliyinə yaxındır.

Pol Kreyq Robertsə görə Amerika administrasiyası Ermənistan, Özbəkistan və Qırğızıstanda ya hakimiyyətləri inqilab yolu ilə devirməyə, ya da onların Vaşinqtona loyallığını satın almağa çalışacaq. Onun fikrincə Ağ Ev dövlət katibinin müavini Viktoriya Nulandı Bakıya və İrəvana təsadüfən göndərməmişdi. Eyni zamanda pensiyaya çıxmış diplomat, rəngli inqilabların konstruktoru hesab olunan Riçard Maylzın geri çağrılaraq Qırğızstana müvəqqəti işlər vəkili göndərilməsi təsadüfi deyil. Özbəkistana səfir göndərilən Pamela Spartlenin qarşısında isə bu ölkənin hakimiyyətinin ABŞ-a sadiqliyini “satın almaq” missiyası qoyulub.

Digər amerikalı analitik Stiven Mak-Millan da eyni fikirdədir. Rusiya hərbi nəşrinin yazdığına görə o, Kanadanın “Global Research” portalında dərc edilmiş məqaləsində göstərir ki, ABŞ Rusiyaya qarşı əsl geosiyasi müharibə aparır.Bu məqsədlə Mərkəzi Asiyada ymeni cəbhə açılıb-orada Vaşinqton rəngli inqilablar, çevrilişlər, qeyri-stabillik üçün zəmin hazırlayır, Moskvanın mövqelərini zəiflətməyə və Rusiyanı tam təcrid etməyə cəhd edir. Analitik hesab edir ki, Qərb Ukraynada tətbiq etdiyi “uğurlu modeli” Ermənistan, Qırğızıstan və Azərbaycanda da sınaqdan keçirmək istəyir.

Qırğızıstan Avrasiya İttifaqına daxil olmağa qərar verdiyi üçün bu Orta Asiya ölkəsində hakimiyyəti devirmək ABŞ-ın mühüm vəzifəsidir. Analitik yazır ki, Qırğızıstanda inqilab təşkil etmək üçün Riçard Maylz Bişkekə göndərilib. O, Gürcüstandakı “qızılgül inqilabı”nın baş rejissoru idi. Vaşinqton Qırğızıstanda hakimiyyəti inqilab yolu ilə dəyişməklə yanaşı Özbəkistanda Kərimov rejimini ələ almağı planlaşdırır. Əgər bu baş tutmasa Vaşinqton orada xaos yaradacaq.

Analitik Viktoriya Nulandın fevral ayında Cənubi Qafqaza səfərinin əsas məqsədlərindən birinin Ermənistanda inqilaba zəmin hazırlamaq olduğunu, diplomatın bu məqsədlə QHT-lərlə qapalı görüş keçirdiyini qeyd edir. Həmin görüşdən sonra Rusiya və Ermənistan narahat olublar, Ermənistan QHT-lərə dair qanunu sərtləşdirməyi qərara alıb. “Azərbaycan hakimiyyətindəki adamlar da narahatdırlar. Onlar istəmirlər ki, ölkələrini rəngli inqilabların alovu bürüsün”-analitik qeyd edir.

Rusiya hərbi nəşri daha sonra Corc Sorosun fondunun maliyyələşdirdiyi “Open Democracy” portalında dərc eidlmiş məqalədən sitat gətirir. Həmin məqalədə deyilir ki, Azərbaycanın Qərblə yaxın münasibətlər saxlaması olduqca mühümdür. Qərb isə öz növbəsində Azərbaycanı demokratik islahatlara başlamağa çağırmalıdır. “Demokratikləşmə” isə əslində Qərbin müxtəlif ölkələrin daxili işlərinə qarışmaq üçün istifadə etdiyi bəhanədir. “Voennoe Obozrenie” qeyd edir ki, Qərbin bu planları Rusiya tərəfindən yaxından izlənir, prezident Putin Avrasiya regionunda sabitliyi qorumaq və rəngli inqilablara imkan verməmək üçün iş aparır.