Sərt karantin rejiminin tətbiq edildiyi şəhər və rayonlarda bir çox iş yerləri bağlanıb, bir çoxu isə fəaliyyətini onlayn şəkildə davam etdirib.

Məlumdur ki, onlayn fəaliyyətini davam etdirən iş sahələrinin öncədən təcrübəsi var, yaxud da qısa müddətdə onlayn satışa hazırlaşa bilmə imkanı olub. Nəticədə qısamüddətli və uzunmüddətli perspektivdə bir çox insanlar işsiz qalıb. Ekspertlər itirilmiş iş yerlərinin hamısının tezliklə bərpa olunacağını proqnozlaşdırmırlar. Cebhe.info pandemiyanın hansı sahələrdə çalışanları tamamilə gəlirsiz qoyduğunu araşdırıb. Məlumdur ki, Azərbaycanda da bir çox iş sahələri bağlanıb, minlərlə insan işsiz qalıb. Etiraf etmək lazımdır ki, gəlir sahələrini itirən insanların bir qismi qeyri-rəsmi şəkildə çalışırdı. Qeyri-rəsmi iş sahələrində çalışanlar artıq demək olar ki, ilin yarısını işləmədən keçiriblər. Qazancı günlük olan dərzi, pinəçi, məişət avadanlıqlarının təmiri ilə məşğul olan şəxslər artıq uzun müddətdir ki, gəlir əldə edə bilmirlər. Onların öz fəaliyyətini onlayn şəkildə təşkil etməsi də həm karantin qaydalarına ziddir, həm də bu sahədə çalışanlar onlayn fəaliyyət göstərmək üçün kifayət qədər təcrübəli deyillər. Digər tərəfdən, toyların qadağan edilməsi bir çox iş sahələrinə də təsirsiz ötüşməyib.

Gəliri birbaşa toyların təşkil olunması ilə bağlı olan ofisiantlar, fotoqraflar, gül salonlarında çalışanlar da xeyli zərər edib. Koronavirusun təsir etdiyi rəsmi, qeyri-rəsmi iş sahələri saymaqla bitmir. Pandemiya dövründə məhz yuxarda sadaladığımız sahələrdə demək olar ki, minlərlə insan işini itirib. Bəlkə də dildə asan səslənsə də, amma bu sahələrdə nə qədər insanın çalışdığını nəzərə alsaq, məsələnin daha ciddi tərəfini görmək olar. Pandemiya ilə əlaqədar sərnişin daşımalarında da azalma müşahidə edilir. Yük daşımaları istisna olmaqla, yerüstü və hava nəqliyyatının fəaliyyətinin məhdudlaşdırılması bu sahədə xidmət göstərən, çörəyi buradan çıxan şəxslərə də təsirsiz ötüşməyib. Martın 18-dən onlar da fəaliyyətini dayandırıb. Koronavirus səbəbi ilə ölkə ərazisində tədris prosesi də dayanıb, uşaq bağçaları bağlanıb. Bu da o deməkdir ki, özəl uşaq bağçalarında, tədris və digər kurslarda çalışanlar da işsiz qalıblar. Nəticədə rəsmi, qeyri-rəsmi sahələrdə çalışan paytaxt sakinləri də karantin rejiminin yumşaldılmasını istəyir. Çünki onlar bu müddət ərzində ən çox zərərçəkmiş, pandemiyanın təsirinə məruz qalanlardandırlar. Karantin rejiminin yumşaldılmasını yay tətilini keçirmək, istirahət etmək üçün fikirləşənlər də də az deyil. Amma necə deyərlər, istirahət üçün pul lazımdır. Pul üçün isə işləmək...

Ekspertlərin dediyinə görə, bizi pandemiyadan sonra biznesin inkişafı və işsizliklə bağlı çətin dövr gözləyir. Qeyd edək ki, ölkə başçısı pandemiya dövründə işçilərin heç bir halda işdən çıxarılmaması barədə tapşırıq verib. Bu məqsədlə hökumət tərəfindən sahibkarlara və biznesə dəstək məqsədilə bir sıra tədbirlər həyata keçirilib. Amma qlobal pandemiya davam edir və bununla əlaqədar ölkəmizdə 5 aydır ki, karantin tətbiq edilir. Prosesin davam edəcəyi də istisna olunmur. Belə olan halda iş yerlərində ixtisarlar və ya bəzi sahələrin dayanması mümkündür. Artıq bu prosesə başlanıb və iş həcmi kəskin azalıb, bəzi sahələr üçün isə 2020-ci il ümumilkdə itirilmiş hesab olunur. Bununla yanaşı, bəzi işəgötürənlər pandemiyanın bitməsini və işçiləri işdən azad etmək üçün zaman gözləyir. Çünki iş həcmini bərpa etmək mümkün olmayacaq. Məsələn, turizm sirkətləri ən azı gələn ilə qədər işləməyəcək. Belə olan halda işçini saxlamaq bu şirkətlərə sərfəli olmayacaq.