Səkkiz il əvvəl şəhid xanımı, məcburi köçkün Aidə Tağıyeva öz pulu ilə yaşamaq üçün Biləcəri qəsəbəsində, Məmiş Abbasov 16 ünvanında yarımzirzəmi bir mənzil alıb. Üstündən illər keçəndən sonra bu yarımzirzəmi uçaraq yararsız hala düşüb. Axırıncı dəfə Bakıya yağan yağışdan sonra isə mənzildə yaşamaq çox təhlükəli olub.

Siçovulların məskən saldığı mənzillərini öz hesablarına təmir etdirərək zirzəmini normal bir evə çevirmək üçün ailə Binəqədi rayon icra hakimiyyətinə müraciət edib. Bütün hadisələr də bundan sonra başlayıb. Ailədən böyük rüşvət tələb olunub. İstənilən rüşvəti verməyə imkanı olmadığından ailə köhnə tikintilərdən sökülən kərpiclə mənzillərinin divarını hörməyə başlayıb. Amma rüşvət tələb edənlər buna imkan vermirlər.
Qaziler.az saytının yazdığına görə, Şəhid Ailələrinə Sosial Dəstək İctimai Birliyinin sədri Almaz Zeynalova təşkilatın üzvləri ilə hadisə yerində olublar. Şəhid ailəsi rüşvət vermədiyi üçün tikintiyə mane olan Binəqədi Rayon İcra Hakimiyyətinin Biləcəri qəsəbəsi üzrə nümayəndəsi İbad İbrahimov şəhid ailələri ilə çox kobud davranıb.
Hətta onları təhqir etməkdən belə çəkinməyib “Bu adam hər kəlməsinin başında şəhid ailəsini, şəhidin balasını təhqir edirdi... Deyir ”Mən şəhid tanımıram!" Binəqədi Rayon İcra Hakimiyyətində də olduq. Eyni hörmətsizliyi orada da gördük. Deyirlər ki, İbrahim İbrahimov elə söz deməz! Öz gözümüzlə gördüyümüz, eşitdiyimiz hadisəni danırlar!"
A.Zeynalova Azərbaycan Respublikasının Prezidenti, Ali Baş Komandan cənab İlham Əliyevin şəhid ailələrinə, Qarabağ əlillərinə çox böyük önəm verdiyini, amma yerli məmurların şəhid adına hörmətsizliyindən giley edib: “Azərbaycan Respublikasının Prezidenti cənab İlham Əliyev şahid ailəsinin problemlərinin həlli üçün çox vacib sərəncamlar, fərmanlar imzalayıb, tapşırıqlar verir. Məmurları bu qəbildən olan insanlara qarşı diqqətli və ədalətli olmağa çağırır! Amma yerli məmurların özbaşınalığı səngimir, dayanmır. Ələlxüsus da son zamanlar şəhid ailələrinə qarşı çox böyük biganəlik, hörmətsizlik başlayıb”.