Bir müddət əvvəl Azərbaycan Qida Təhlükəsizliyi Agentliyi (AQTA) ölkədə satılan kolbasa və sosiska məmulatlarının monitorinqini keçirdi. Həmin məhsulların tərkibləri yoxlanılan zaman məlum oldu ki, cəmiyyətə “halal” adı ilə sırınan məhsulların tərkibində donuz əti var. Məhsulun istehsalçısı nəinki Azərbaycan qanunlarını çeynəyib, hətta Allahı da tanımaqdan imtina edərək, donuz əti tərkibli məhsulun üzərinə “Halal” yazaraq, satışa buraxıb. Yəqin ki, AQTA bu yoxlamanı keçirməsəydi, bu işbaz hələ də dininə bağlı olan şəxslərə və halal nemətlərə üstünlük verənlərə donuz ətini yedirəcəkdi. İslam dini bilməyərəkdən etdiyimiz səhvləri, bilməyərəkdən yediyimiz haramı bizim üçün günah hesab etmir.
TEREF.AZ-ın məlumatına görə, ilahiyyatçı İbrahim Məmmədov Bizimyol.info xəbər portalına açıqlamasında bildirib ki, şübhəli qidalardan ehtiyat edib, çəkinmək İslam dinin əsas göstəricilərindəndir. Yəni bir qidanın halal olub-olmaması ilə bağlı şübhə yarandığı zaman üzərimizə düşən vəzifə ondan çəkinməkdir.

İlahiyyatçı qeyd edib ki, dinimizdə bilmədən və ya unutqanlıqdan edilən hər hansı bir əməl günah sayılmır.

“Əgər bir şeyin halal olması barədə əminsinizsə, bu zaman haram olsa da belə (yəni sizi aldatsalar da) istifadə edən kəs üçün günah yoxdur. Aldadan şəxs isə, böyük günaha batmış hesab edilir”,- deyə ilahiyyatçı bildirib.

İslam dini niyə donuz ətini haram buyurub?

İbrahim Məmmədov qeyd edib ki, İslam dinində donuz ətinin haram olmasının səbəbi insan orqaniziminə ciddi zərər vurması ilə bağlıdır. İlahiyyatçının sözlərinə görə, ümumiyyətlə, İslam dinində əti haram olan bütün heyvanların istifadəsinin (yeyilməsinin) qadağan olunması sağlamlığa zərər vermələri ilə əlaqəlidir.

“Donuz öz nəcisini (pisliyini) yeyən heyvandır. Donuz həm öz pisliyi ilə qidalanır, həm də bioloji quruluşu ilə başqa heyvanlara nisbətdə çox miqdarda antitel istehsal edir. Elm də sübut edir ki, donuzun bədənində başqa heyvanlara və insana nisbətdə çox ifrat dozada böyümə hormonu istehsal olunur. Çox miqdarda olan bu antitel və böyümək hormonlarda dövran yolu ilə donuzun əzələ toxumasına da keçərək yığılıb qalır. Donuz ətində çox miqdarda xolesterol və lipid də var. Bütün bunların nəticəsində ifrat səviyyədə antitellər, hormonlar, xolesterol və lipidlərlə zəngin olan donuz ətinin insan sağlamlığı üçün ciddi təhlükə mənbəyi olması elmi yolla sübut edilmişdir”-deyə ilahiyyatçı qeyd edib.