"Andreessen Horowitz"in hesabatına əsasən "ChatGPT" hələ də süni intellekt sahəsində lider mövqeyini qorusa da, "Gemini", "Grok" və "Meta AI" kimi rəqiblərin fərqi tədricən azaltdığı bildirilir.

Valyuta.az xəbər verir ki, bu məhsullar son iki il yarım ərzində həm veb, həm də mobil platformalarda əhəmiyyətli irəliləyiş əldə ediblər.

"Gemini" hazırda mobil tətbiqlərdə "ChatGPT"yə ən yaxın rəqib hesab olunur. Aylıq aktiv istifadəçi baxımından hələ də "ChatGPT"dən geri qalmasına baxmayaraq, xüsusilə Android platformasında geniş istifadəçi bazasına malikdir. Veb trafikində isə "ChatGPT" ziyarətlərinin təxminən 12 faizini əldə edərək ikinci yerə yüksəlib.

"Grok" tətbiqi "xAI" tərəfindən hazırlanıb və ilkin mərhələdə yalnız "X" platformasında istifadəyə verilmişdi. 2025-ci ilin iyul ayında təqdim olunan "Grok 4" versiyası ilə istifadəçi bazası təxminən 40 faiz artıb. Eyni zamanda, bu versiyanın təqdimatından bir neçə gün sonra iOS platformasında əldə olunan gəlir 99 min dollardan 419 min dollara yüksəlib.

"Meta AI" vebdə 46-cı yerdə qərarlaşıb, lakin mobil tətbiqlər arasında ön sıralarda yer ala bilməyib. Bu məhsul bəzi istifadəçilərin icazəsi olmadan məlumat paylaşması ilə bağlı tənqid edilib.

Çin mənşəli süni intellekt məhsulları da diqqət çəkir. "Quark", "Doubao" və "Kimi" kimi tətbiqlər vebdə ilk 20-likdə yer alıb. "Doubao" mobil siyahıda dördüncü sırada qərarlaşıb. Mobil platformada ilk 50-yə daxil olan tətbiqlərin 22-si Çində hazırlanıb, lakin onlardan yalnız üçü Çində istifadə olunur.

Bundan əlavə, "Claude", "Perplexity", "Character AI", "Midjourney", "Leonardo" və "QuillBot" kimi süni intellekt platformaları da yüksələn tendensiya göstərir və sahədə mühüm mövqe tuturlar.