Böyük Britaniyanın Baş naziri Kir Starmerin reytinqi hakimiyyətə gələndən bəri ən aşağı səviyyəyə düşüb.

AZƏRTAC “The Sunday Times”a istinadla xəbər verir ki, vətəndaşların əksəriyyəti onun hökumətini keçmiş Mühafizəkarlar hökuməti qədər xaotik hesab edirlər.

“More in Common” tədqiqat mərkəzinin keçirdiyi sorğuya əsasən, seçicilər Baş naziri 5 milyard funt sterlinq dəyərindəki sosial müavinətlərin azaldılması planından geri çəkildiyinə görə günahlandırırlar. Bu qərardan imtina maliyyə naziri Reyçel Rivzin parlamentdə emosional anlar yaşaması ilə yanaşı, ictimai etimadın daha da azalmasına səbəb olub.

Aparılan sorğunun nəticələri Starmerin təsdiq reytinqinin -43 olduğunu göstərib. Bildirilib ki, seçicilərin 70 faizi Leyboristlər hökumətinin əvvəlki Mühafizəkar hökumət qədər, bəzən isə ondan da çox qeyri-sabit olduğunu düşünür.