Azərbaycan iqtisadiyyatının "xəstə" olduğunu bizim publik məkanda yayımlanan reklam və elanlar da sübut edir. Bu gün maşında radioya qulaq asıram, reklam bloku zamanı eşitdim ki, flan bank istehlak kreditini 12,5%-lə, flan bank 12%-lə təqdim edir, elə eyni blokda başqa bir bankın kiçik və orta sahibkarklar üçün biznes kreditlərini 15,5%-dən başlayaraq, digər bank isə 16%-dən başlayaraq təqdim etdiyini reklam etdilər.
Teref.az yazır ki, bu fikirləri iqtisadçı ekspert Natiq Cəfərli deyr. Daha sonra ekspert dediklərini şərh edərək deyir:
Bu reklam çarxları belə iqtisadiyyatın xroniki "xəstəliyini" göstərir – normal sistemi, rəqabətli iqtisadiyyatı, ədalətli idarəetməsi olan ölkələrdə həmişə biznes kreditləri istehlak kreditlərindən həm ucuz, həm də uzunmüddətli olur.
Yəni normalda, misal üçün, istehlak kreditləri 5% olanda, biznes kreditləri 3%-i keçməməlidir – bizdə isə tam tərsinədir. İstehlak kreditləri ilə əhalinin yüklənməsi isə ciddi ertələnmiş problemlər deməkdir – bir müddət sonra istehlak kreditləri problemli kreditlərə çevriləcək və bank sektorunda dalğalı vəziyyət yaranacaq.
Prezident hər dəfə deyir ki, ölkədə əla biznes mühit var, amma biznes kreditləri istehlak kreditlərindən bahadırsa, deməli biznes mühit pisdir, məmləkətin iqtisadiyyatı “xəstədir”, “müalicəsi” isə artıq iqtisadiyyatda deyil, bu “dərdin dərmanı” idarəetmə sisteminin islahatıdır...
Teref.az