Yeni tədris ilinin başlanmasına sayılı günlər qalıb. Bir neçə gündən sonra uşaqlarımız yeni təhsilə başlayacaqlar, kimi orta təhsilini davam etdirəcək, kimi ali təhsilə başlayacaq. Bu önəmli zamanda uşaqlarınıza verəcəyiniz tövsiyələr həm sizin üçün, həm də uşaqlarınız üçün böyük əhəmiyyət kəsb edir.
Övladınıza zaman ayırın və onunla danışın: boyu, çəkisi, görünüşü, ev həyatı və ya zövq aldığı şeylərə görə kiməsə istehza ilə yanaşmağa, kimisə ələ salmağa haqqı olmadığını başa salın. Başa salın ki, insanlar, eləcə də onların istəkləri, arzuları, vərdişləri müxtəlifdir və bu, heç bir zaman münahisə mövzusu olmamalıdır.

Övladınıza izah edin ki, hər gün məktəbə eyni geyimi və ya eyni ayaqqabını geyinmək ayıb deyil. Əslində təhsilinə ciddi şəkildə önəm verən şagirdlər və tələbələr buna qarşı çıxmırlar. Deyin ki, istifadə edilmiş bir çanta ilə yeni alınmış bir çanta eyni funksiyanı həyata keçirir. İzah edin ki, geyimləriniz, daşıdığınız aksesuarlar sizi əks etdirmir. Sizi əks etdirən hörmət qazandıran davranışlarınız olmalıdır.

Məktəb sıralarında “fərqli” uşaqlar ola bilər. Bu da sizin övladınıza əsas vermir ki, həmin uşaqları kənarlaşdırsınlar. Sevmədikləri insanlarla məsafə saxlaya bilərlər, amma bu da mübahisələrə baş qoşmamaq, təhsilə daha çox zaman ayırmaq və sevmədikləri insanlardan uzaq olmaq üçün olmalıdır.

Kimisə müzakirə etmək, kiminsə arxasınca danışmaq, kiminsə vərdişlərini istehza hədəfinə çevirməyin düzgün olmadığını izah edin...

Daha acınacaqlı bir durumu da nəzərə alaraq uşaqlarınıza izah edin: atalar deyir ki, “sirrini dostuna demə, dostunun da dostu var”. İnsanlara sirr açacaq qədər dost olmamağı tövsiyyə edin.

Övladınızla söhbətdə xüsusilə qeyd edin ki, bütün uşaqlar sevgi dolu mühitdə yetişmir. Xaraktersiz, özünü idarə edə bilməyən, pis vərdişləri olan uşaqlar ola bilər. Onlarla məsafəli davranmalarını izah edin.

Mütləq vurğulayın ki, hər bir uşaq öz valideyninin, ailəsinin güzgüsüdür. Və bildirin ki, hər şey ailədən başlayır...

İradə Cəlil, Bizimyol.info