Belçika Baş Prokurorluğu 2022-ci il dekabrın 9-da "Yaxın Şərq ölkələrindən biri ilə korrupsiya ittifaqı”adlı əməliyyat keçirib. Əməliyyata qədərki istintaq hərəkətləri ciddi siyasi dairələrin korrupsiyaya bulaşması faktını aşkara çıxarıb. İstintaq hərəkətlərinin gedişindən bəlli olub ki, proses Avropa Parlamentinin vitse-prezidentinə qədər uzanır. Beləliklə, istintaq materiallarına əsasən həbslərə sanksiya verilib.
Avropa Parlramentinin vitse-prezidenti Eva Kayli və daha üç nəfər artıq həbs olunub. Onlardan birinin xanım Kaylinin həyat yoldaşı olduğu bildirilir.
"Agence France Presse" xəbər verir ki, digər iki nəfərdən biri, Avropa Parlamentinin sosialist fraksiyasından olan italiyalı keçmiş deputat Pier Antonio Panzeri, digəri Beynəlxalq Həmkarlar İttifaqları Konfederasiyasının rəhbəri Luka Visentidir.
Baş verənlərlə bağlı ümumilikdə beş Avroparlament yetkilisinin ofisi möhürlənib. Daha on beş ofisin möhürlənəcəyi gözlənilir.
Yeri gəlmişkən, yunan əsilli Eva Kayli siyasi fəaliyyətinə qədər, həm də teleaparıcı və bəzi filmlərdə rol alan aktrisa kimi tanınırdı. O, siyasi fəaliyyətə Sosialist Partiyasının üzvü kimi başlayıb. Avropa Parlamentinin Sosialistlər və Demokratlar Fraksiyasında təmsil olunub. Artıq bütün statuslardan məhrum edilən xanım Kayli korrupsiyaya bulaşmış avropalı siyasətçi kimi tarixə düşüb. O, artıq Brüsselin Korrupsiyayla Mübarizə Üzrə Mərkəzinin əməkdaşlarına təhvil verilib.
İndi keçmiş vitse-prezidentin iqamətgahından tapılan beş yüz min avronun haradan əldə edilməsi və nə məqsədlə evdə saxlanılması dəqiqləşdirilir.
Elan edilən rəsmi ittihamda isə xanım Kayli Qətər hakimiyyətindən rüşvət almaqda, Avropa İttifaqının siyasətinə mənfi təsir göstərməkdə günahkar bilinir.
Jalə Mütəllimova-Seyidli
Teref.az