Vergi daxilolmaları 85% , ÜDM isə cəmi 5,2% artıb...- İqtisadçı ekspert...
11-12-2022, 08:24

2022-ci ilin yanvar-noyabr aylarında İqtisadiyyat Nazirliyi yanında Dövlət Vergi Xidmətinin xəttilə dövlət büdcəsinə 14 milyard 726 milyon 776 min manat vergi daxil olub, ötən ilin müvafiq dövrü ilə müqayisədə vergi daxilolmaları 85% və ya 6,7 milyard manatdan çox artıb.
Yaxşı, iqtisadiyyat elminə, hesab-kitaba görə vergi daxilolmaları 85% artıbsa, bu həmin ölkədə iqtisadi artımın fontan vurması, iqtisadi partlama yaşaması demək olardı, amma rəsmi məlumata görə 2022-ci ilin yanvar-oktyabr aylarında ölkədə əvvəlki ilin eyni dövrü ilə müqayisədə 5,2% çox ümumi daxili məhsul istehsal olunub, yəni, ÜDM cəmi 5,2% artıb.
Teref.az yazır ki, bunu iqtisadçı ekspert Natiq Cəfərli deyir. Daha sonra fikirlərini şərh edən ekspert davam edərək deyir:
Bəs bu nə möcuzədir ki, vergidaxilolmaları 85%, tamı-tamına 6,7 mlrd. manat artıb, nəyin hesabına bu baş verib?! Qeyri-neft sektorundan daxilolmalar 7 milyard 583 milyon manat olub, ötən ilin müvafiq dövrü ilə müqayisədə bu sektordan vergi daxilolmaları 29,2% və ya 1,7 milyard manatdan çox artıb. Yəni, 6,7 mlrd. manatın 1,7 mlrd. manatını qeyri-neft sektoru verib, artımın qalan 5 mlrd. manatını isə neft sektoru təmin edib. Yaxşı, artımın 5 mlrd. manatını neft-qaz sektoru təmin edibsə bu hökumətin yaxşı işləməsidir, ya dünyada neft-qaz qiymətlərinin yüksəlməsinin nəticəsidir?!
Xub, 2022-də bəxtimiz gətirdi, neft-qaz baha oldu, bəs sonra ucuzlaşan dövrdə nə edəcəyik, büdcə daxilolmaları nəyin hesabına artacaq?! Deyəcəksiz ki, qeyri-neft sektorunun, amma bu sahədə də keçən ilə nisbətən 1,7 mlrd. artıq vəsait toplanması iqtisadi aktivliyin kəllə-çarxa çıxması nəticəsində deyil, əsasən mühasibatlığın “ağarmasına” görədir. “Ağardılması” yaxşıdırmı, təbii ki, əladır, olmalıdır, amma bir tək “ağartmaqla” 1 ii, iki il, yaxşı, lap 3 il artıq vəsait toplayarsan da, bu daimi proses deyil ki, hər il dadına çatsın?! Bu proses də bitəndən sonra nə olacaq, hökumət nəyi ağardacağıq, dişlərini?!
Xülasə, rəsmi makroiqtisadi göstəricilər məmləkətin neft-qazdan faciəvi asılılığını hər rəqəmi ilə sübut edir, qeyri-neft sektorunun inkişafı üçün isə, “ingilisdilli məmurlar” deyil də, iqtisadi azadlıqlar və ədalətli məhkəmə mühiti lazımdır.
Məhkəmə də ədalətli olsa, dünən Bəxtiyarı həbs eləməz – bax hər şey bir-birinə bu qədər bağlıdır məmləkətdə...
Teref.az