“Ermənistan və Türkiyənin tezliklə birbaşa hava yükdaşımalarına başlayacağı ehtimalı güclüdür”.

“AzPolitika.info” xəbər verir ki, bu barədə erməni mediasına müsahibəsində Ermənistanın Türkiyə-Ermənistan münasibətlərinin nizamlanması prosesində xüsusi nümayəndəsi Ruben Rubinyan bildirib.

“Noyabrın əvvəlində keçirilən texniki görüşdə bu sazişin icrası da müzakirə olundu və onun tezliklə həyata keçirilməsi üçün yaxşı şans var. Mən konkret tarixləri qeyd etməkdən çəkinəcəyəm, lakin bunun yaxın gələcəkdə baş verməsi ehtimalı çox yüksəkdir”, - Rubinyan bildirib.
Ətraflı

Dünən “Hurriyet Daily News”un Türkiyə nəşri öz diplomatik mənbələrinə istinadən yazıb ki, Türkiyə ilə Ermənistan arasında münasibətlərin normallaşmasının ikinci mərhələsi başlayıb və ola bilsin ki, qarşılıqlı hava daşımalarına yeni ildən əvvəl start verilsin. Eləcə də Armavir vilayətinin sərhəddindəki Əlicandan üçüncü ölkə vətəndaşları üçün Marqara sərhəd-keçid məntəqəsi açılacaq.

“Hazırda Türkiyə ilə Ermənistan arasında hər iki istiqamətdə birbaşa hava daşımaları mümkün deyil, biz bunu mümkün etməkdən danışırıq”, - Ermənistanın xüsusi nümayəndəsi vurğulayıb.

Rubinyan vaxtı dəqiqləşdirməsə də, xatırladır ki, birbaşa yükdaşımalara qoyulan qadağanın aradan qaldırılması və keçid məntəqəsinin qismən açılması ilə bağlı siyasi razılaşmalar hələ yayda, elçilərin sonuncu görüşü zamanı əldə olunub. Praktiki addımlar noyabrın əvvəlində atılıb, Ermənistan-Türkiyə sərhədində tərəflərin texniki qruplarının görüşüb.