Dünən İlkinin məlum çıxışını dinləyəndə onun nə üçün belə etdiyi barədə çox düşündüm. Düzü, Eynulla həbsdən çıxandan sonra elədikləri yadıma düşdü. O da həbsdən qəhrəman kimi çıxmışdı. Çıxandan sonra verdiyi əcaib, ziddiyyətli açıqlamalar hamını heyrətləndirirdi, lakin heç kəs cürət edib ona söz deyə bilmirdi. Bir neçə tədbirdə Eynulla barədə düşündüklərimi açıq dedim. Sonra o özü də mövqeyini tam açıb ortaya qoydu və onunla bağlı situasiya cəmiyyətə aydınlaşdı.
Mən İlkinlə Eynullanı eyniləşdirməkdən uzağam. Amma ortada elə məsələlər var ki, onlara cavab tapmaqda çətinlik çəkirəm. İlkin axmaq adam deyil. Bu mənada iqtidarın çirkin bir əməlini tirajlamaqla faktiki heç kəsin ciddi əhəmiyyət verməyəcəyi bir olayı ölkə gündəmini zəbt edəcək hadisəyə çevirdiyini dərk etməyəcək qədər naşı da deyil. İlkinin paylaşdığı statusların altında iqtidar trollarının canfəşanlıqla paylaşdıqları şərhlər Osman Kazımovun təbirincə desək iqtidar tərəfindən hazırlanan "xüsusi əməliyyatda" əsas hədəfin kim olduğunu dəqiq göstərir. Bu çirkab dolu şərhlər niyə orada qalır, niyə silinmir?
Görünən odur ki, iqtidardakılar İlkinin xarakterini artıq yaxşı öyrəniblər və öz aləmlərində onun vasitəsillə "əməliyyat" keçirməklə bizə, ailəmizə qurşaqdan aşağı zərbə vurmağa cəhd etdilər. Amma boş cəhdlərdi. Alınmayacaq. Bizlərə çirkab yapışmayacaq. Əksinə, bu "qara piar"ın zərəri son nəticədə onu təşkil edənlərə dəyəcək. Nahaq yerə deməyiblər ki, xalqın gözü tərəzidir. Hər kəs kimin kim olduğunu yaxşı bilir.
Bir neçə kəlmə Bəxtiyar Hacıyevin müdafiəsi barədə. Bilənlər bilir, səhhətimin imkan verdiyi vaxtlarda uzun illər siyasi və vicdan məhbuslarının müdafiəsi ilə məşğul olmuşam. Heç bir qrant almadan, heç kəsdən heç bir təmanna güdmədən. Bu mənada mövzu barəsində öz mülahizələrimi söyləməyə tam mənəvi haqqımın olduğunu düşünürəm.
Bir dəfə "Azadlıq" radiosunda siyasi məhbus mövzusunda diskussiyaya dəvət olunmuşdum. Söhbət o vaxt həbsdə olan Rəhim Qazıievdən düşəndə iqtidardan olan deputat bildirdi ki, Rəhim Şuşanı satıb filan. Mən Rəhim Qazıyevi danışdırmıram, bu gün də üz - üzə gələndə salam vermirəm. Amma o verilişdə onu müdafiə etdim və məhkəmədə ona qarşı olan ittihamların sübut olunmadığını bildirdim. Verilişdən sonra hələ mənim "Müxalifət" qəzetinin baş redaktoru olduğum müddətdə Rəhim Qazıyevə olan antipatiyamı yaxşı bilən sabiq əməkdaşımız və həmin dövrdə radioda redaktor olan Natiq bəy soruşdu ki, nə əcəb Rəhim Qazıyevi müdafiə etdiniz? Mənim cavabımı gözləmədən özü "şəxsi münasibət başqa, prinsiplər başqa" deyə öz sualına cavab verdi. Əgər İlkinin dedikləri həqiqətdirsə və doğurdan da Bəxtiyar Hacıyev onun həyat yoldaşına nəlayiq təklif edibsə, bunu biləndən sonra niyə telefonunu satıb onun hüquqlarını müdafiə etməlisən? Sağlam niyyətlə müdafiə etmisənsə daha etdiyin yaxşılığı kiminsə başına vurma, "onu müdafiə edənlər iqtidardan paket alır" tipli şantajla bütün cəmiyyətə öz diktəni yeritməyə cəhd etmə. Əgər məqsəd son nəticədə yoldaşına münasibətdə nəlayiq hərəkət edən şəxsi cəzalandırmaq olubsa, buna görə əvvəldən onun müdafiəçisi qismində çıxış etməyə qəti zərurət yox idi.
Düşünürəm ki, kimin vicdanı varsa, yazdıqlarımdan düzgün nəticə çıxaracaq.
Vaqif Hacıbəyli
Teref.az