Xəbər verdiyimiz kimi, bu yaxınlarda İnam Kərimov Kənd Təsərrüfatı naziri vəzifəsindən azad olunaraq Ali Məhkəmənin sədri təyin edildi. Bu təyinata qədər İnam Kərimov 5 il nazir kimi fəaliyyət göstərdi.
Maraqlıdır, İnam Kərimovun KTN rəhbərlik etdiyi dövr nə ilə yadda qaldı? Bu sahədə hansı dəyişikliklər baş verdi?

Teref.az bildirir ki, məsələ ilə bağlı Bakupost.az -a açıqlama verən iqtisadçı-ekspert Natiq Cəfərli İnam Kərimovun kariyerasında ən uğurlu məqamın “ASAN Xidmət”lə bağlı olduğunu bildirib.
O qeyd edib ki, “ASAN Xidmət” yarandığı gündən İnam Kərimov rəhbər vəzifədə çalışıb və bu qurumun insanlar arasında rəğbət və hörmət qazanması üçün müsbət fəaliyyət göstərib.
İqtisadçı İnam Kərimovun kənd təsərrüfatı sahəsindəki fəaliyyət barədə fikirlərini də açıqlayıb.
Natiq Cəfərli hesab edir ki, onun nazir olduğu müddətdə yeganə yaddaqalan məsələ subsidiyalarla bağlı olub:
“Əvvəllər çox qarışıq, qeyri-effektiv sistem var idi. Subsidiyaların verilməsində çox ciddi yeyinti hallarına rast gəlinirdi. İnam Kərimovun nazir olduğu müddətdə bəzi məsələlərdə irəliləyiş əldə olundu. Subsidiyaların verilmə qaydaları dəyişdirildi. Əvvəlki problemlər bir qədər aradan qalxdı. Lakin kənd təsərrüfatı sahəsində bundan başqa ciddi nailiyyətlərin olduğunu söyləmək mümkün deyil”.
N.Cəfərli kənd təsərrüfatı sahəsində mövcud olan problemlərə də diqqət çəkib:
“Kənd təsərrüfatı sahəsində nəticə əldə etmək daha çətindir. Çünki bu, daha ağır sahədir. Xüsusi biliklərə sahib olmaq lazımdır. İnam Kərimovun çox yaxşı hüquqi təsili olsa da, görünür, bu, yetərli deyil. Həm də kənd təsərrüfatı bir çox sahələrlə əlaqəlidir. Suvarma məsələsi, yerli icra hakimiyyətlərinin maneələrini buna misal çəkmək olar”.

Hüquqşünas Ələsgər Məmmədli də İnam Kərimovun “ASAN Xidmət”də fəaliyyəti ilə kifayət qədər pozitiv imic formalaşdırdığını bildirdi:
"Xüsusən bürokratik əngəllərin, xırda rüşvətin aradan qaldırılmasında, qurumun vətəndaşlara geniş xidmətlər göstərməsində mühüm rol oynadı. Bu baxımdan onu pozitiv kadr kimi qiymətləndirmək lazımdır. Lakin kənd təsərrüfatı sahəsində o qədər də parlaq nailiyyətləri olmadı. Suvarma sahəsindəki problemlər olduğu kimi qalır. Məhsuldarlıq da artmayıb. Biz kənd təsərrüfatı sahəsindəhələ də xarici ölkələrdən asılıyıq”.