“Polad Günbəz” layihəsi çərçivəsində Türkiyə Silahlı Qüvvələrinə (TSK) 47 hava hücumundan müdafiə, radar və elektron döyüş sisteminin təhvil verilməsi dünya gündəmini zəbt edib.

Referans xəbər verir ki, bu mühüm addım həm Türkiyədə, həm də beynəlxalq mətbuatda geniş rezonans doğurub. ABŞ-dan ərəb mediasına qədər yayılan şərhlərdə layihənin miqyası və strateji əhəmiyyəti xüsusi vurğulanıb.

ASELSAN dünən həm Oğulbəy Texnologiya Bazasının təməlini qoyub, həm də Polad Günbəz sisteminin əsas komponentlərini TSK-ya təqdim edib. Prezident Rəcəb Tayyib Ərdoğan bu uğuru tarixi nailiyyət adlandıraraq, sistemin həm dostlara güvən, həm də düşmənlərə qorxu aşıladığını bildirib.

Layihənin başlanmasından cəmi bir il sonra Türkiyə ən böyük inteqrasiya olunmuş hava hücumundan müdafiə sisteminə sahib olub. Ərdoğan açıqlamasında 2026-cı ilin ortalarına qədər kompleksin ilk obyektinin fəaliyyətə başlayacağını bildirib.

Türkiyə mediası Ərdoğanın “50 illik vizyonu”nu vurğulayaraq ASELSAN-ı Türk müdafiə sənayesinin ürəyi adlandırıb.

Prezident bildirib:

“Türkiyə yalnız öz ehtiyaclarını qarşılamaqla kifayətlənməyəcək, həm də texnologiyada dünyaya liderlik edəcək”.

Xatırladaq ki, Türkiyə 1974-cü ildə Kipr əməliyyatına görə ABŞ-ın tətbiq etdiyi embarqodan sonra müdafiə sənayesinə böyük sərmayələr yatırmağa başlamışdı. Bu baxımdan “Polad Günbəz” dönüş nöqtəsi kimi qiymətləndirib. //globalinfo.az