İtaliyada turist “Van Qoqun kreslosu” adlanan eksponata oturaraq onu sındırıb.

Bizim.Media xəbər verir ki, bu barədə NYP məlumat yayıb.

Hadisə Verona şəhərindəki Maffei Sarayında baş verib. Minlərlə Swarovski kristalı ilə bəzədilmiş bu əsər italiyalı rəssam Nikola Bollaya məxsusdur və məşhur hollandiyalı rəssam Van Qoqun rəsmlərindəki stulu xatırlatdığı üçün bu adla tanınır. Muzey kreslonu zərif və parlaq incəsənət nümunəsi kimi təqdim edib.

Turistin xanımı əvvəlcə kreslonun qarşısında əyilərək guya otururmuş kimi poza verib və şəkil çəkdirmək istəyib. Kişi isə tam şəkildə oturacağın üstünə oturub. Nəticədə stul onun çəkisinə dözməyərək sınıb, kişi isə tarazlığını itirib və yıxılmamaq üçün divardan yapışmağa çalışıb.

Qadın ona kömək etməyə çalışıb və sonra cütlük zaldan qaçaraq çıxıb.

Muzey əməkdaşları sosial şəbəkələrdə turistlərin hərəkətini qınayıb, hadisənin videosunu paylaşaraq bunu “incəsənətə və mədəni irsə hörmətsizlik” adlandırıblar. Bildirilib ki, cütlük mühafizəçilərin zalı tərk etməsini gözləyib və bundan sonra şəkil çəkməyə başlayıb.

Muzeydən bildirilib ki, zədələnmiş eksponatın bərpası mümkündür.