44 saylı məktəbdən də xaric olunan Sevinc Allahverdiyeva test imtahanlarında iştirak edir...

Məlumdur ki, bir neçə il öncə Sabunçu rayonu Aydınbəyov küçəsi 9 ünvanında yerləşən 215 saylı tam orta məktəbin direktoru Sevinc Allahverdiyava haqqında mediada gedən tənqidi yazılardan sonra vəzifəsindən, ümumiyyətlə, məktəbdən uzaqlaşdırıldı.
Həmin vaxt Sevinc Allahverdiyeva jurnalistləri asıb-kəsir, onları ağı ağ, qaranı qara yazmağa dəvət edirdi. Və yazılanları şər-böhtan adlandırırdı.
Bu adamdan soruşan olmadı ki, əgər yazılanlar şər-böhtan idisə, niyə səni direktorluqdan qovdular, hətta məktəbdən kənarlaşdırdılar.
İkincisi, sənin haqqında yazılanların nəyi şər-böhtan idi..?
Tənqidi yazılarda məktəb direktorunun şagirdlərdən, onların valideynlərindən, hətta məktəbin müəllimlərindən belə rüşvət tələb etdiyi qeyd olunurdu.
Bildirilirdi ki, məktəbdə tədris prosesinin səviyyəsi aşağı vəziyyətdədir. 1-ci, 9-cu, 10-cu və 11-ci siniflərdə şagirdlərin davamiyyəti bərbad haldadır.
Və üstəlik ali məktəblərə repetitor yanında hazırlaşan şagirdlər direktorla nəyinsə qarşılığında razılaşıb dərsə gəlmirlər.
Bundan başqa, məktəbdə müəllimlər arasında ayrıseçilik salınır. Belə ki, hansı müəllimin Sevinc Allahverdiyeva ilə münasibətləri yaxşıdırsa, ona çox dərs saatı yazılır. Direktorun qanunsuz əməllərinə etiraz edən müəllimlərə isə az dərs saatı yazılır.
Tənqidi yazılarda Sevinc Allahverdiyeva özünə yaxın olan bir neçə şəxsin adını məktəbdə texniki işçi kimi qeydiyyatdan keçirib maaşlarını alması qeyd olunurdu.
Sözün qısası Sevinc Allahverdiyevanın bu əməlləri kollektivdə ciddi narazılıq yaradırdı.
Ümumiyyətlə, Sevinc Allahverdiyevanın həmin məktəbə direktor gəlməsindən sonra məktəbdən ali məktəblərə qəbul olunanların sayı aşağı düşmüşdü.
Bütün bu neqativ hallar azmış kimi, Sevinc Allahvediyeva dövlət tərəfindən məktəbin saxlanmasına, təsərrüfat mallarının alınmasına yetərincə vəsait ayrılsa da, təsərrüfat malları həmin vəsaitlə yox, müəllimlərdən, eləcə də şagirdlərdən yığılan pulla alınırdı.
Hətta 1-ci sinifə qəbul məsələsi Təhsil Nazirliyinin nəzarəti altında aparılsa da, Sevinc Allahverdiyeva bir sıra yollara baş vuraraq bu işdən də öz xeyrini götürür. Məsələn, övladı 1-ci sinifə gedən valideynlər məcburiyyət qarşısında direktora «minnətdarlıq» edir. Bundan başqa, məktəbdə təhsil alan bütün şagirdlər maddi vəziyyətlərindən asılı olmayaraq bayramlarda direktoru «təbrik» etməlidirlər.
Sevinc Allahverdiyeva isə guya arxasında Sabunçu Rayon İcra Hakimiyyətinin başçısı Adil Vəliyevin durduğunu hamıya deyərək məktəbdə istədiyi qaydanı tətbiq edirdi.
Bütün bunara görə, Təhsil Nazirliyinin ozamankı rəhbərliyi Sevinc Allahverdiyevanı 215 saylı məktəbdən uzaqlaşdıra bildi. Amma...
Əmması odur ki, Sevinc Allahverdiyeva hansı yollasa özünü Nəsimi rayonu ərazisindəki 44 saylı orta məktəbə pərçim edə bildi. Özü də direktor müavini kimi.
Bir soruşan da olmadı ki, neqativ əməllərinə görə, məktəb direktoru vəzifəsindən qovulan adam, qısa vaxtdan sonra başqa bir məktəbdə necə direktor müavini ola bilər..?
Təkcə bu fakt onu göstərir ki, orta məktəblərdə direktor olmaq istəyənlərə himayədarlıq edən geniş bir rüşvətxor şəbəkə var.
Beləcə, Sevinc Allahverdiyeva 44 saylı orta məktəbdə direktor müavini kimi çalışmağa başladı.
Amma öyrəşdiyi əməllərdən əl çəkə bilməyən Sevinc Allahverdiyeva 44 saylı məktəbdə də qalmaqallara səbəb oldu. Və işindən uzaqlaşdırıldı. Amma...
Əmması odur ki, “verdiyimi qaytarın” deyərək hay-küy salan Sevinc Allahverdiyeva doğma bacısını öz yerinə, yəni direktor müavini vəzifəsinə təyin etdirə bildi.
Və beləcə Sevinc Allahverdiyeva ikinci bir məktəbdən də “deport” edildi.
Amma illər uzunu tamah dişi məktəblərə batan, külli miqdarda qazanan Sevinc Allahverdiyeva direktor olmaq üçün hər yerə baş vurmağa başladı. Təki hansısa məktəbdə direktor olsun.
Bəs görəsən, bir neçə məktəbdə imzası olan Sevinc Allahverdiyeva indi haradadır..?
Mediaya daxil olan məlumata görə, Sevinc Allahverdiyeva hazırda yenidən məktəb direktoru olmağa hazırlaşır.
Belə ki, sabiq məktəb direktoru yenidən direktor olmaq üçün test imtahanlarında iştirak edir.
Sözümüzün canı odur ki, Sevinc Allahverdiyeva kimilərinin tamah dişi məktəblərə necə batıbsa, onlar heç vaxt bu işlərindən əl çəkmək istəmirlər.
Ona görə də məktəblərimizi rüşvətdən xilas etmək üçün belə məktəb direktorlarının ya tamah dişlərini çəkmək, ya da ağızlarını möhkəm-möhkəm tikmək lazımdır.
gundelik baki.com