Deputatdan I siniflərlə bağlı problemə maraqlı reaksiya:"Vəzifəli şəxsi bu maddəni oxumağa məcbur edin!"

29-08-2017, 08:30           

Fazil MUSTAFA,

Milli Məclisin deputatı



Artıq neçə gündür ayrı-ayrı insanlardan üzərimə xahişlər yağır. Bəlkə də son 20 gündə 20-yə yaxın tanışdan, dostdan, tanımadığım vətəndaşlardan müraciət alıram ki, bəs uşağı birinci sinifə qəbul etmirlər. Bəhanələr də budur ki, ya məktəbdə boş yer yoxdur, ya da öncədən qeydiyyatdan keçməyib. Hələ litsey adlanan məktəblərdə 1-ci sinif uşaqları üçün, guya, sınaq imtahanı keçirilib və lazımi balı toplamadıqlarına görə məktəbə qəbul etmələri mümkün deyil.

Anlayıram ki, məktəblərdə yerlə bağlı problem var, müəllimələrin sinfə götürəcəyi şagird sayı üçün də limit var. Yəni obyektiv çətinliklər mövcuddur və bunu sadəcə həmin məktəblərin direktorlarının üzərinə ittiham olaraq yönəltmək istəməzdim. İnsanlara kömək etmək də imkanım xaricindədir, çünki bütün günü götürüb məktəblərə məktub yazmalıyam ki, bəs filan uşağı məktəbə götürmək sizin borcunuzdur, xahiş edirəm, borcunuzu yerinə yetirəsiniz…

Ancaq bütün bunların həm də bir rüsvayçı tərəfi mövcuddur. Birinci sinfə gedən uşaq axı niyə sınaq imtahanından və ya müsabiqədən keçməlidir?! Azərbaycan Respublikasının Konstitusiyasının 42-ci maddəsi var: "Dövlət pulsuz icbari ümumi orta təhsil almaq hüququnu təmin edir"!

Buyurun, uşaq evinə yaxın məktəbdə oxumaq istəyir, valideyn niyə dağa-daşa düşməlidir uşağını məktəbə qoymaq üçün?! Əslində biz dövlət olaraq cəhalətdən, kriminaldan qurtulmaq üçün vətəndaşa yalvarıb övladını məktəbə cəlb etmək əvəzinə, vətəndaş yalvarır ki, mənim uşağımı məktəbə götürün!

Valideynlərin tək çıxış yolu var: evinizə yaxın köşkdən "Azərbaycan Respublikasının Konstitusuyası" yazılmış kitabçanı alıb onun 42-ci maddəsinin altından xətt çəkin və "sizin uşağı məktəbə götürə bilmərik" deyilən kimi, istənilən vəzifəli şəxsi bu maddəni oxumağa məcbur edin! Yenə də bir nəticə ortaya çıxmasa, dərhal məhkəməyə müraciət edin. Narahat olmayın, məhkəmə mütləq xeyrinizə qərar çıxaracaq, çünki əks halda Konstitusiya pozulmuş olacaq.

Neçə illərdir bizdə dərslər sentyabrın 15-də başladığına görə, gündəmdən sentyabrın 1-də qeyd etməyə alışdığımız "Bilik günü" və ya bayramı deyilən məfhum tamamilə yoxa çıxıb. Bu, əslində məktəblərimizdən biliyi yoxa çıxarmaq üçün sanki unutdurulan bir tarixdir. Təhsilə gec başlamaq sübh tezdən günəş işığının 3-4 saatını yuxuda keçirməyə bənzəyən bir durumdur. İndi 1 sentyabrda yenə də məktəb olmayacaq, "Bilik bayramı" da olmayacaq, ancaq nə xoş ki, "Qurban bayramı" məhz həmin gün olacaq. Bu bayramın da fəlsəfəsi budur ki, Yaradana şükr etmək üçün ona qurban kəsməlisən. Kəsəcəyin qurban da adamdan olmaz, mütləq bəlli heyvan cinsindən olmalıdır. Bu o deməkdir ki, adamdan qurban kəsilmirsə, onun təhsilini də, biliyini də nəyəsə, kiməsə qurban vermək olmaz! Odur ki, kimsə ilk başlanğıcdan körpə fidanlarımıza stress yaşatmasın! Bütün səlahiyyətli şəxslər anlamalıdırlar ki, məktəbdə oxumağa başlamaq ali məktəbdə oxumaq deyil, dövlət tərəfindən təmin olunan hüquqdur!












Teref.info © 2015
E-mail: [email protected]            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.