Kreml Rusiya Prezidenti Vladimir Putin və onun türkiyəli həmkarı Rəcəb Tayyib Ərdoğan arasında baş tutmuş telefon danışığına dair məlumat yayıb.

APA-nın Moskva müxbirinin Kremlin mətbuat xidmətinə istinadən verdiyi məlumata görə, Rusiya və Türkiyə liderləri Dağlıq Qarabağla bağlı 9 noyabr 2020-ci il tarixli və 11 yanvar 2021-ci il tarixli Rusiya, Azərbaycan və Ermənistan liderlərinin üçtərəfli bəyanatlarından irəli gələn razılaşmaların həyata keçirilməsini və regionun sosial-iqtisadi inkişafı naminə birgə səylərin koordinasiyasını müzakirə ediblər.

Dağlıq Qarabağda atəşkəsə nəzarət üzrə Rusiya-Türkiyə Birgə Mərkəzinin işindən məmnunluq ifadə olunub.

Bundan başqa, Rusiya və Türkiyə liderləri koronavirus pandemiyası ilə mübarizədə əməkdaşlığın möhkəmləndirilməsini müzakirə ediblər, iki ölkə arasında energetika sahəsində birgə böyük layihələrə toxunublar.