Türkiyədə gələn il keçiriləcək prezident seçkilərində müxalifətin namizədinin kim olacağı ilə bağlı müzakirələr davam edir.

Cebhe.info xəbər verir ki, İYİ Partiya sədri Meral Akşenerin bu barədəki son açıqlaması gündəm olub.

Belə ki, partiya sədri "Habertürk" telekanalında qonaq olarkən diqqətçəkən ifadələr səsləndirib.

O, İstanbul Böyük Şəhər Bələdiyyəsinin sədri Əkrəm İmamoğlu və Ankara Böyük Şəhər Bələdiyyəsinin sədri Mansur Yavaşın prezidentliyə namizəd olması ehtimalı ilə bağlı danışıb:

"Həm Mansur, həm də Əkrəm bəyə bütün seçicilərin sevgisi və hörməti var. Bütün anketlərdə adları keçir. Masadakı liderlərə də dedim ki, əgər onlardan biri namizəd göstərilsə, "hə" deyəcəyik".

Bu zaman jurnalist Kürşat Oğuz Cümhuriyyət Xalq Partiyasının sədri Kamal Kılıçdaroğlunun namizədliyi ilə bağlı sual versə də, Akşener yenə də qarışıq cavab verərək, onu dəstəkləməyib:

"Mən onların (İmamoğlu və Yavaşın) namizədliyi danışılarkən verəcəyimiz cavabdan bəhs edirəm".

Qeyd edək ki, Meral Akşenerin bu açıqlaması geniş şəkildə müzakirələrə səbəb olub. İYİ Partiya sədri və üzvləri proseslərin əvvəlindən etibarən Kılıçdaroğlunu deyil, İmamoğlu və Yavaşı dəstəklədiklərini hər fürsətdə göstərirlər.