Redaksiyaya Laçın rayonundan məcburi köçkün Quliyev İsak Qulu oğlu tərəfindən ölkə prezidentinə və birinci vitse-prezidentə ünvanlanmış şikayət məktubunun surəti daxil olmuşdur.

Məktubunda 6 nəfərdən ibarət ailəsi ilə birlikdə acınacaqlı ev şəraitində-dəmir vaqonda yaşayan əill vətəndaş Əli Həsənovun sədri olduğu Qaçqın və Məcburi Köçkünlərin İşləri Üzrə Dövlət Komitəsinin ona adi şiferi belə qıymamasından, amma “Qaçqınkom”un öz nəvələrinə və qohum-əqrabasına bahalı avtomobillər,milyonluq mülklər, restoran və obyektlər almasından şikayət edir,“Qaqınkom”a qarşı konkret faktlarla ittihamlar səsləndirir.

Həmin müraciəti olduğu kimi oxuculara təqdim edirik:

“Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya

Laçın rayonundan məcburi köçkün, Bakı şəhəri Suraxanı rayonu ərazisində dəmir vaqonda məskunlaşmış əlil Quliyev İsak Qulu oğlu tərəfindən

ƏRİZƏ

Çox hörmətli Prezidentimiz va xanımı!

1992-ci ildən Laçın rayonundan məcburən köçərək Bakı şəhəri, Suraxanı rayonu ərazisində altı nəfərlik ailəmlə dəmir vaqonda yaşayıram. Özüm də daxil olmaqla ailə üzvlərindən əlil olanlarım var. Bu vaxtlara qədər pis-yaxşı dolanırdıq. Yaşadığımız vaqon artıq yararsız haldadır. Dəfələrlə Qaçqın və Məcburi Köçkünlərin İşləri Üzrə Dövlət Komitəsinə müraciət etmişəm ki, “mənə heç olmasa 6-7 ədəd şifer verin, vaqonumun üstünü özüm bağlayım”. Oradan məni çox pis təhqir edərək qovdular və dedilər ki, “sənə şifer verməyə imkanımız yoxdur”.

Ancaq mən öyrənmişəm ki, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov pulların hamısını öz qızının əri Elman Allahverdiyevə və yaxın ətraflarının müəssisələrinə köçürür .

Köçürülən pullara Əli müəllimin nəvəsi Nail Allahverdiyev isə aşağıdakı maşınları alıbdır. Aldığı maşınlarla nəvəsi iki nəfəri öldürüb, iki adamı isə əlil etmişdir.

1.Mercedes G wagon Brabus 10-PP-203 475000 manat

2.Mercedes G 65 AMG 90-HH-203 370000 manat

3.Mercedes Benz SLS AMG 10-OO-203 345000 manat

4.Mercedes Benz AMG CT 10-VV-003 220000 manat

5.Aston Martin 10- MM-203 335000 manat

6.Porsche 10-YY-203 110000 manat

7.Audi Q-7 10-VV-203 120000 manat

8.Bentley Continental GT 10-OO-014 450000 manat

9.Lexus 570 90-PL-110 200000 manat

10.Maserati 10-RR-999 180000 manat

11.Jaguar 10-US-999 420000 manat

Əli Həsənovun təkcə qız nəvəsinə aldığı maşınların dəyəri 3225000 ( üç milyon iki yüz iyirmi beş min) manatdır. Hələ onun digər nəvələrinə və qohum -əqrabasına aldığı mülklər, restoranlar və obyektlər də vardır.

Hörmətli Prezident,

Mənim kimi əlilə adi şifer verməyən sədrin hələ gizlində görün nələri vardır. Adamları isə mənə va ailəmə hədə-qorxu gəlirlər.

Xahiş edirəm köməkliyinizi bizdən əksik etməyin.

Hörmətlə, Quliyev İsak Qulu oğlu

Redaksiyadan: Qeyd edək ki, bu cür ittihamlar Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov haqda ilk dəfə səslənmir.

Bundan əvvəl də dəfələrlə onun nəvələrinə məxsus olan bir neçə milyonluq maşın kolleksiyasının fotoları və videoları mətbuatda , sosial şəbəkələrdə yayılıb və indi də bu məsələ gündəmdən düşmür.



Xatırladaq ki, Əli Həsənovun nəvəsi -1994-cü il təvəllüdlü Nail Allahverdiyevin 2017-ci il, avqustun 3-də saat 21:00 radələrində paytaxtın Nərimanov rayonu ərazisində Heydər Əliyev prospektində “Mercedes Galendawagen” markalı maşını ilə törətdiyi qəza iki nəfərin ölümünə, iki nəfərin isə ağır yaralanmasına səbəb olmuşdur. Məhkəmə kollegiyasının hökmü ilə N.Allahverdiyev 6 il müddətinə azadlıqdan məhrum edilmişdir..
Tumar