“Mən Prezident İlham Əliyevlə bütün görüşlərimdə insan haqları məsələsini qaldırmışam və bundan sonra da qaldıracağam”. Bunu ABŞ Helsinki Komissiyasının sədri Kristofer Smit "Amerikanın səsi"nə bildirib.

O, Bakıda artıq iki dəfə olduğunu və bu səfərlərdə insan haqları məsələsinə xüsusi diqqət ayırdığını bildirib. Kristofer Smit iyulda Osloda keçiriləcək görüşlərdə Azərbaycan nümayəndə heyəti ilə bu məsələni müzakirə etməyi planlaşdırdığını bildirib.

Azərbaycanda vüsət alan həbslər və repressiya dalğasına mümkün cavab variantları haqda danışan cənab Smit Qlobal Maqnitski Aktı qəbul olunduğu təqdirdə bunun insan haqlarını pozan Azərbaycan rəsmilərinə şamil oluna biləcəyini vurğulayıb.

“2004-cü ildə Belarus Demokratiya Aktının müəllifi mən olmuşam. Həmin qanuna əsasən Aleksandr Lukaşenko hökumətinin 200 rəsmisinə Amerikaya gəlmək qadağan olunub. Avropa rəsmiləri də oxşar qadağalar tətbiq ediblər,” deyə Konqresmen izah edib.

“Qlobal Maqnitski Aktına əsasən hər ölkə üzərində ayrıca təhlil aparılacaq və bu qanuna uyğun olaraq insan haqları pozuntularında iştirak etmiş adamlara ABŞ-a gəliş qadağan ediləcək.”

Nyu Cersi ştatından Nümayəndələr Palatasının Respublikaçı üzvü Kristofer Smit ABŞ Helsinki Komissiyasının sədridir. 1976-cı ildə təsis olunmuş komissiya Helsinki Yekun Aktı və başqa ATƏT öhdəliklərinə əməl olunmasının monitorinqi ilə məşğul olur.