Rusiyanın bir neçə kəşfiyyat qrupu Gümrüdəki hərbi bazaya yerləşdirilib. Bu iddianı Axar.az-a açıqlamasında NATO Əməkdaşlıq İnstitutunun rəhbəri Fərrux Məmmədov səsləndirib. Onun sözlərinə görə, bu, Rusiyanın Ermənistan ərazisində keçirməsini planlaşdırdığı böyük təlimlə əlaqədardır. Xatırladaq ki, dünyanın nəhəng hərbi əks-kəşfiyyat xidmətlərində sayılan Rusiya Silahlı Qüvvələri hərbi kəşfiyyat idarəsinin (QRU) rəisi general-polkovnik İqor Serqunun Ermənistana səfəri Qərb siyasi dairələrində xüsusi həssaslıqla izlənilir. Moskvanın baş hərbi kəşfiyyatçısını İrəvana göndərməsi çoxsaylı suallar və narahatlıq doğurub.