"OpenAI" süni intellekt əsaslı "ChatGPT" platformasında vizual kontent yaratma funksiyasını artıq bütün pulsuz istifadəçilərin ixtiyarına verib.

Valyuta.az xəbər verir ki, daha əvvəl yalnız ödənişli istifadəçilər üçün əlçatan olan bu xüsusiyyət geniş istifadəçi marağı səbəbi ilə qısa fasilədən sonra ümumi istifadəyə təqdim olunub.

"OpenAI"nin baş direktoru Sem Altman bu barədə "X" platformasında paylaşım edərək funksiyanın aktivləşdirildiyini açıqlayıb. Rəsmi olaraq dəqiq limitlər bildirilməsə də, Altmanın əvvəlki açıqlamalarına əsasən, pulsuz istifadəçilər gündəlik maksimum üç vizual yarada biləcəklər. Göstərilən limiti aşdıqda isə platforma istifadəçiləri ödənişli abunəlik planlarına keçməyə təşviq edəcək.

Qeyd edək ki, yeni funksiyanın istifadəyə verilməsi ilə paralel olaraq "OpenAI" 40 milyard dollar həcmində yeni investisiya raundunu da tamamlayıb. Nəticədə şirkətin ümumi bazar dəyəri 300 milyard dollara çatıb.