Gürcüstanın 9-cu çağırış Parlamentinin 150 yeni seçilmiş deputatının səlahiyyətlərinin tanınmasından və siyasi qrupların qeydiyyatından sonra qanunverici orqan Gürcü Arzusu partiyasının icra katibi İrakli Kobaxidzeni 3 əleyhinə olmaqla, 118 səslə parlament sədri seçdi.
39 yaşlı İrakli Kobaxidze 2015-ci ilin yanvarında icra katibi statusunda Gürcü Arzusu partiyasına qoşulub. 2002-2006-cı illərdə Dusseldorf Universitetində magistr və doktorluq dərəcəsi aldıqdan sonra gürcü universitetlərində pedaqoji fəaliyyətlə məşğul olub və paralel olaraq, BMT-nin müxtəlif inkişaf proqramlarında menecer olub. Həmçinin Gürcüstanın Avropa Şurası təmsilçiliyində strateji planlaşdırma üzrə ekspert kimi fəaliyyət göstərib. Bundan başqa Kobaxidze “Açıq Cəmiyyət – Gürcüstan” fondunda qanunçuluq proqramının ekspertlər komitəsinin üzvü olub.