Elçin Quliyev sabiq şefinin qandallanması üçün yetərli ifadə verdi

Ləğv edilmiş Milli Təhlükəsizlik Nazirliyi (MTN) Antiterror Mərkəzinin rəisi, general-mayor Elçin Quliyev və Mərkəzin əməkdaşı, polkovnik Azər Mehdiyevin cinayət işi üzrə məhkəmə prosesi davam edir.

Artıq prokuror Elçin Quliyevin 15 il, Azər Mehdiyevin 13 il müddətinə azadlıqdan məhrum edilməsini istəyib. Eyni zamanda onların hərbi rütbədən məhrum olunması və əmlaklarının müsadirə edilməsi də təklif edilib.

Məhkəmənin gedişatında E.Mahmudovun əleyhinə danışmayan sabiq işçisi Elçin Quluyev ona cəza istəniləndən sonra çox kəskin çıxış edib.

Bildirib ki, heç bir cinayəti yoxdur. O, kimin cinayət etdiyini açıqlayıb: “Mən özümü təqsirkar bilmirəm. Çünki mənim heç bir günahım yoxdur. Cinayət törətməmişəm”.

Zərərçəkmiş Mətləb Mustafayevin həbs edilməsinə münasibət bildirən general-mayor deyib ki, bunun sifarişini məhz nazir özü edib: “Eldar Mahmudov prokurorluqla razılaşdıraraq, Mətləbin evinə tapança qoydurub, həbs etdirib”.

Zərərçəkmiş Mətləb Mustafayev də bildirib ki, Elçin Quliyev ötən prosesdə çıxış edərək Eldar Mahmudovun onunla görüşmək istədiyini deyib: “Çıxışında açıqca dedi ki, Eldar Mahmudov vəzifədən azad olunandan sonra onunla məxfi yollarla görüşmək istəyib, lakin Elçin razılaşmayıb. Bundan başqa, Elçin Quliyev həbsxanada intihar edən İlqar Əliyevdən danışdı. Elçin çıxışında İlqarın ona zəng edərək, vəkil istədiyini dedi”.

Vəkili E.Quliyevin barəsində bəraət hökmünün çıxarılmasını və mülklərindən həbsin götürülməsini tələb edib. Polkovnik Azər Mehdiyevin vəkili də çıxış edərək bəraət istəyib. Proses noyabrın 27-də davam edəcək.

Elçin Quliyev MTN-in Antiterror Mərkəzinin rəisi olub. MTN-lə bağlı həbslər başlayanda o, adıçəkilən qurumun akademiyasına kafedra rəisi təyin edilmişdi. Daha sonra cinayət işi üzrə həbs olundu.

Onun məhkəmədəki Eldar Mahmudova yönəlik çıxışları ilə tanış olan ekspertlər deyirlər ki, general-mayor sabiq şefinə qarşı çox ciddi ifşaedici mövqedədir. Onun məhkəmədə açıqladığı məlumatlar ciddi şəkildə araşdırılmalı və hüquqi qiymət verilməlidir: “Hüquqi baxımdan yanaşanda Elçin Quliyevin məhkəmədəki fikirləri Eldar Mahmudovun istintaqa cəlb olunması üçün əsas ola bilər. İstintaq Elçin Quliyevin ifadəsini alıb təsdiqləyici sübutlar toplamalı, zərərçəkən tərəfi dinləməlidir. Elçin Quliyevin dedikləri həqiqətdirsə, Mətləb Mustafayevin evinə silahı Eldar Mahmudovun sifarişi ilə qoyub özünü həbs ediblərsə, bu halda Eldar Mahmudova ittiham irəli sürülməsi üçün əsas yaranır.


Düzdür, Eldar Mahmudovun MTN-də baş verən cinayətlərdə nazir kimi dolayı və birbaşa əli olduğu bilinən cinayətlər haqda çoxsaylı məlumatlar var. Hazırda isə sabiq nazirin əleyhinə birbaşa tabeçiliyində olmuş, general-mayor rütbəli biri ifadə verir. Bu çox ciddi bir olaydır və Eldar Mahmudovun həbs ediləcəyi artıq mübahisə doğurmur. Bundan başqa sabiq nazirin barəsində bir qədər əvvəl xüsusi qərardad da çıxarılıb və cinayət işi başlanılması üçün Baş Prokurorluğa göndərilib. Göründüyü kimi, Eldar Mahmudov barəsində son addımın atılması üçün bütün şərtlər var. Onu yaxın zamanda həbs edəcəklər. Hazırda baş verənlər bunu qaçılmaz edir".

Ekspert xatırladır ki, E.Mahmudovla bağlı 2 ildən artıq müəmmalı şəkildə davam edən proses artıq yeni mərhələyə qədəm qoyub: “Milli Təhlükəsizlik Nazirliyində 2015-ci ilin oktyabrında başladılan proses Eldar Mahmudov üçün yaxşı heç nə vəd etmədiyi bəlli idi. Baş verənlərdən belə nəticəyə gəlmək olurdu ki, hakimiyyətin onunla bağlı perspektiv planları var və gerçəkləşməsi üçün Eldar Mahmudovun azadlıqda olması vacibdir. Məsələn, Eldar Mahmudovdan bəzi maliyyələrin geri qaytarılması istiqamətində danışıqlar aparılması haqda bilgilər vardı. Necə ki, başqaları ilə, eyni qaydada Eldar Mahmudovla da iş aparılırdı. Artıq həmin danışıqlar da, danışıqların mövzusu da həll olunub. Mümkündür ki, Eldar Mahmudov ondan tələb olunanlarla vidalaşıb və ya haradasa razılaşmayıb. İstənilən halda, prosesin nəticəsindən asılı olmayaraq Eldar Mahmudov görüntü xatirinə də olsa istintaqa çağırılmalı, məhkəmə qarşısına çıxarılmalı idi. Ona veriləcək ittihamlardan və barəsində çıxarılacaq hökmdən sonra hazırda Eldar Mahmudovun ətrafında gedən proseslərə daha dəqiq qiymət vermək mümkün olacaq. Hələlik isə bizlər Eldar Mahmudovun ətrafında olan general-mayorun onun üzünə qarşı ifadə verməsini görürük və məhkəmədəki çıxışlar onun həbsi üçün yetərlidir”.

Qeyd edək ki, ləğv edilmiş MTN-in Situasiya Mərkəzinin rəis müavini vəzifəsində işləmiş Malik Mustafayevin intihar etməsi və onun qardaşına təzyiqlər edilməsi ilə bağlı həbsdə olan MTN-in Antiterror Mərkəzinin rəisi olmuş general-mayor Elçin Quliyev istintaq zamanı bir qədər fərqli ifadələr vermişdi.

Malik Mustafayev 2014-cü ildə işdən çıxarıldıqdan bir müddət sonra intihar etmişdi. Onun qardaşı Mətləb Mustafayev qanunsuz silah saxlamaqda təqsirli bilinərək həbs olunmuşdu. O, Cinayət Məcəlləsinin 228.1-ci (qanunsuz silah daşıma) maddəsi ilə təqsirli bilinərək 2 il müddətinə azadlıqdan məhrum edilmişdi. MTN ləğv edildikdən sonra 2016-cı ilin sonlarında azadlığa buraxılmışdı.

E.Quliyev ibtidai istintaqa ifadələrində bildirmişdi ki, Malik Mustafayevi MTN-in Yevlax rayon şöbəsinin rəisi olan vaxtlardan, onun qardaşı Mətləb Mustafayevi isə həbs olunandan sonra tanıyıb: “Malik Mustafayevin sonuncu xidməti vəzifəsi MTN-in Situasiya Mərkəzinin rəis müavini olub. Dəqiq tarixi xatırlamadığım vaxtda bir dəfə Mətləb Mustafayevlə söhbət etmişəm. Qardaşının MTN-də hörmətli şəxs olmasını deyərək, mənzilində aşkar olunmuş silahla bağlı məlumat əldə etməyə çalışdım. Bildiyimə görə, Malik Mustafayev də Mətləblə bu barədə söhbət etsə də, o, silahı haradan alması barədə məlumat verməyib. Mətləb Mustafayevlə söhbətimiz zamanı vəkil iştirak etməyib”.

E.Quliyevin sözlərinə görə, Mətləb Mustafayevdə silah olması, onun İranda yaşayan Rza, Hüseyn adlı şəxslər və qeyriləri ilə əlaqəsi olması barədə 10 sentyabr 2014-cü ildə MTN-in İstintaq İdarəsinə məktubla məlumat verib: “Təxminən bir həftədən sonra yenidən əməliyyat məlumatı əsasında Mətləb Mustafayevin qohumlarında silah olması barədə istintaq idarəsinə məlumat vermişəm. Lakin Mətləb Mustafayevin qohumlarının evindəki axtarışlar zamanı silah aşkar olunmayıb. Mətləb Mustafayevin mənzilində axtarış zamanı İlqar Əliyev və əməkdaşlarımızın orada iştirak etməsini təmin etmişəm. Mətləb Mustafayev isə MTN-in istintaq təcridxanasında saxlanılan zaman ola bilərdi ki, Antiterror Mərkəzinin əməkdaşları ilə söhbət etsin. Mətləb Mustafayevlə əsas işi tapşırığım əsasında İlqar Əliyev qurub. Mətləb Mustafayev həbs ediləndən sonra onunla görüşmüşəm, silahı haradan əldə etməsi ilə bağlı söhbətimiz olub. Mətləb Mustafayevdən evində aşkar olunmuş silahı haradan əldə etməsi ilə maraqlandım. Həmin söhbət zamanı onunla istintaqla bağlı deyil, əməliyyatla bağlı söhbət etdiyim üçün vəkilinin iştirakını təmin etməmişəm”.

Göründüyü kimi, ibtidai istintaqa ifadəsində general-mayor keçmiş şefini satmayıb, onun əleyhinə ifadə verməyib. İndi isə situasiya dəyişib, Mahmudovu özünün birbaşa tabeçiliyində olanların ifadələri ilə həbs göndərirlər. Belə də o uzaqdan-yaxından tanışlığı olan istintaqçılara, onların rəhbərlərinə də hər hansı bir irad bildirə bilməyəcək. Danışacaq və ona deyəcəklər ki, əlinin altında olan şəxs əleyhinə ifadə verirsə, biz kimik?
musavat.com/