Avstraliya cümə axşamı məskunlaşan yeddi israilliyə məhdudiyyətlər tətbiq edib. Hökumət onların fələstinlilərə qarşı zorakılıqda iştirak etdiyini iddia edib.

Onlardan biri, fermer Yinon Levi bu ilin əvvəlində Birləşmiş Ştatlar tərəfindən sanksiyaya məruz qalıb və ona ABŞ-ın bütün aktivlərinə, əmlakına və Amerika maliyyə sisteminə daxil olmaq qadağan edilib. ABŞ onu fələstinlilərə qarşı zorakılığı qızışdırmaqda və əkin sahələrini yandırmaqda günahlandırıb. Levi heç bir qanunu pozmadığını iddia edib və ittihamları israrla rədd edib.

Avstraliya həmçinin İsrailin "Hilltop Gəncləri" dini qrupuna da sanksiya tətbiq edib. Qrup İordan çayının qərb sahilində məskunlaşma məntəqələri yaratmaqla məşğuldur.

Bu addım Beynəlxalq Ədalət Məhkəməsinin İsrailin Fələstin ərazisindəki yaşayış məntəqələrinin beynəlxalq hüquqa uyğun olaraq, qeyri-qanuni olduğu qənaətinə gəlməsindən sonra atılıb. İsrail məhkəmənin qərarının "birtərəfli"olduğunu və hüquqi qüvvəyə malik olmadığını deyib.

Fələstinlilərin dediyinə görə, israilli mühacirlər tərəfindən törədilən zorakılıqlar İsrailin İordan çayının qərb sahilinin geniş əraziləri üzərində nəzarətini genişləndirmək məqsədi daşıyır və Fələstin dövlətinin yaradılması səylərinə zərbə vurur.

Avstraliyanın xarici işlər naziri Penni Vonq sanksiyalara məruz qalanların iddia edilən cinsi təcavüz və işgəncələr də daxil olmaqla, fələstinlilərə qarşı ağır zorakılıqlarda iştirak etdiyini deyib.

İsrailin Kanberradakı səfirliyi Fələstin icmalarına qarşı zorakılıqları pisləyib və cümə axşamı verdiyi açıqlamasında "İsrail bu işlərdə iştirak edən ifrat azlığı ədalətə çatdırmaq üçün çalışacaq" deyib.

Avstraliyanın sanksiyaları ABŞ, Britaniya, Kanada və Yaponiyanın oxşar tədbirlərindən sonra tətbiq olunub.