İllərdir ki, yerli özünüidarəetmənin əsas daşı olan bələdiyyələrin fəaliyyətində şəffaflıq, məsuliyyət və vətəndaşla birbaşa ünsiyyət ciddi şəkildə əskikdir. Bir çox rayon və kəndlərdə bələdiyyə orqanları ya formal fəaliyyət göstərir, ya da vətəndaşların müraciətlərinə cavab vermədən sadəcə sənədlərlə işləyən qurum funksiyasını daşıyır.

“DogruXeber.az”ın araşdırmalarına əsasən, kəndlərdə ən çox şikayət edilən məsələlərdən biri bələdiyyə torpaqlarının gizli və qaranlıq şəkildə bölüşdürülməsi, sənədlərin satılması və bəzən heç bir rəsmi tender və ya ictimai elan olmadan torpaq sahələrinin yaxın çevrələrə verilməsidir. Vətəndaş isə ya məlumatlandırılmır, ya da məsələni qaldırdığı anda müxtəlif bəhanələrlə qarşılaşır.

Xüsusilə yeni tikinti aparmaq, torpaq bölgüsü və ya sadə bir arayış almaq üçün belə bələdiyyə idarələrində süründürməçilik halları geniş yayılıb. Bəzi hallarda sənəd üçün vətəndaşdan rəsmi ödənişdən əlavə qeyri-rəsmi "şirinlik" istənilir. Hüquqi baxımdan bu, açıq şəkildə korrupsiyadır, lakin nəzarət mexanizmləri demək olar ki, mövcud deyil.

Ən ciddi məsələ isə vətəndaşın bələdiyyə idarəsinə olan inamının yoxa çıxmasıdır. İnsanlar illərlə yaşadıqları kənddə öz torpaqları ilə bağlı heç bir qərarda iştirak edə bilmirlər. Toplantılar keçirilmir, hesabatlar dərc olunmur, bələdiyyə sədrləri seçildikdən sonra sadəcə “kabinet sədri”nə çevrilirlər.

“DogruXeber.az” bildirir ki, bəzi bölgələrdə bələdiyyələrin fəaliyyətsizliyi nəticəsində torpaqla bağlı yüzlərlə mübahisə məhkəmə müstəvisinə daşınıb. Əhalinin hüquqlarının təmin olunması üçün nəzərdə tutulan bu qurumlar əksinə, hüquq pozuntularının mərkəzinə çevrilib. Yerli özünüidarəetmə prinsipi isə kağız üzərində qalır.