Rusiyanın Baytarlıq və Fitosanitar Nəzarət Federal Xidməti (Rosselxoznadzor) 21 oktyabrdan etibarən Qazaxıstandan gətirilmiş çiçəklərin və çiçək qönçələrinin idxalına müvəqqəti məhdudiyyətlər tətbiq edəcək.

İqtisadiyyat.az xəbər verir ki, bu barədə "Rosselxoznadzor"un saytına məlumat yerləşdirilib.

Federal Xidmət açıqlayıb ki, çiçəklər Rusiyaya fitosanitar sertifikatlarla daxil olur, lakin bu sertifikatlar əsasən Rusiyanı dəstəkləməyən ölkələrdən gətirilən məhsullara aiddir.

İdxalın dayandırılması qərarı, çiçəklərdə aşkar olunan qərb çiçək tripsi adlı zərərvericinin 43 halı ilə bağlıdır. Bu zərərvericinin Rusiyada yayılmasına yol verilsə, iqtisadi ziyan 11,5 milyard rubldan çox ola bilər.

"Qazaxıstan əsasən Niderland, Polşa və Belçikadan çiçəkləri re-ixrac edir. Lakin bu ölkələrin müvafiq orqanları məhsulun təhlükəsizliyinə lazımi nəzarəti təmin etmirlər",-deyə "Rosselxoznadzor" əlavə edib.

Bundan əlavə, 17 oktyabrda "Rosselxoznadzor" Qazaxıstandan Rusiyaya buğda, mərcimək, pomidor, bibər və qovun idxalına da müvəqqəti məhdudiyyətlər qoyub. Agentliyin məlumatına görə, 2024-cü ilin əvvəlindən Qazaxıstandan gətirilən məhsullarda karantin obyektlərinin aşkarlandığı 215 hal qeydə alınıb ki, bu da ötən ilin göstəricisini dörd dəfə üstələyir.