ABŞ-ın Ermənistandakı səfirliyinin yaydığı bəyanat ictimaiyyətdə narahatlıq doğurub.

Globalinfo.az xəbər verir ki, bəyanatda İrəvan hökumətinə çağırış edilərək qeyri-qanuni yollarla ABŞ-a köçən və burada yaşayan ermənilərin könüllü şəkildə ölkədən çıxmaları üçün hərəkətə keçməli olduqları qeyd edilir.

Səfirliyin “Facebook” səhifəsində paylaşılan bəyanatda hökumətin həmin şəxsləri könüllü şəkildə ABŞ-dan çıxmağa təşviq etməli olduğu vurğulanır:

“Əgər Amerika Birləşmiş Ştatlarında qeyri-qanuni şəkildə yaşayan birini tanıyırsınızsa, hökumət orqanları onları tapmamışdan əvvəl ölkəni könüllü şəkildə tərk etməli olduqlarını bildirin. Onları buna təşviq edin. Hər kəsə verilən mesaj aydındır: düzgün seçim edin, qanuna uyğun davranın, ailənizi və gələcəyinizi təhlükəyə atmayın”.

Qeyd edək ki, Donald Tramp prezident seçildikdən sonra ABŞ-da qeyri-qanuni yollarla miqrasiya edən müxtəlif ölkələrdən olan minlərlə şəxs deportasiya olunub. Onların arasında ermənilər də var. 2023-cü ilin sentyabrda keçirilən antiterror əməliyyatlarından sonra Qarabağdan Ermənistana köçənlərin əksəriyyətinin son iki ildə müxtəlif xarici ölkələrə getdiyi, onların əsas seçiminin isə ABŞ olduğu bildirilir.