"Artıq ABŞ dünyada təhlükəsizliyin təminatçısı deyil"

Bu sözləri ABŞ-li bloqer Mario Naufala müsahibəsində Birləşmiş Ştatların Türkiyədəki səfiri və bu ölkənin Suriya üzrə xüsusi nümayəndəsi Tom Barak Vaşinqtonun xarici siyasətindəki bəzi dəyişikliklərdən danışarkən deyib.

Tom Barak xatırladıb ki, İkinci Dünya müharibəsindən sonra ABŞ dünyada təhlükəsizliyin təminatçısı olmağa çalışıb.

"Bizim Marşal Planımız (İkinci Dünya müharibəsindən sonra Avropaya yardım proqramı - red.), GATT (Tariflər və Ticarət üzrə Baş Saziş - İkinci Dünya müharibəsindən sonra iqtisadiyyatı bərpa etmək məqsədi ilə 1947-ci ildə bağlanmış beynəlxalq müqavilə - red.) kimi sazişimiz var idi, biz azad dənizlərə çıxdıq, bütün dünyada azad ticarəti təmin etdik. Lakin bu gün tamamilə fərqli bir model var. Biz söyləyirik, artıq dünyada təhlükəsizliyin təminatçısı deyilik. Hər kəs özünü müdafiə etməyi bacarmalıdır", - deyə Tom Barak vurğulayıb.