“Ermənistan KTMT-yə 4-cü maddə (dövlətə hücum) üzrə müraciət etməyə hazırlaşır”.

Bunu siyasi analitik Asif Nərimanlı deyib.

O, Ermənistanın məqsədini “Sherg.az”a açıqladı:

“Təhlükəsizlik Şurasınını katibi Armen Qriqoryan bu gün sərhəddə erməni hərbçisinin “ölümü”ndən danışarkən bildirib ki, böhrandan çıxış yolları, diplomatik metodlar tükənir, KTMT-yə 4-cü maddə üzrə müraciət etməkdən başqa çıxış yolu qalmır. KTMT-yə 2-ci maddə (dövlətə hücum təhdidi) ilə müraciət edən Ermənistanın prosesi 4-cü maddəyə uyğunlaşdırmaq üçün təxribatlar törədəcəyi haqda danışmışdım. Ötən günlər ərzində baş verən təxribatın məqsədi də 4-cü maddə üzrə müraciətin gündəmə gətirilməsi idi. KTMT nizamnaməsinin 4-cü maddəsinə görə, üzvlər müraciət edən ölkəyə birmənalı şəkildə dəstək verməlidir.

İrəvan Bakını təkləmək, KTMT-ni, dolayısı ilə Rusiyanı prosesə müdaxiləyə məcbur etmək, yeni imzalanacaq müqaviləni öz maraqlarına uyğunlaşdırmaq, Moskva və Ankaranı üz-üzə qoymaq, bütün bunlar baş tutmasa, seçkiöncəsi və sonrası hərbi ittifaqın - rusların dəstək verməməsindən siyasi oriyentasiyasını dəyişdirməkdə istifadə etmək istəyir”