Jurnalistlər Rusiyanın hakimiyyət elitasının yaxın qohumlarına müharibəyə getməyi təklif ediblər. Onların bəziləri səfərbərliklə bağlı sualı eşidəndən sonra telefonu qapadıblar…

Pia.az xəbər verir ki, oktyabrın 4-də Rusiyanın “Важные истории” nəşri “Qızıl Rota” adlı məqalə dərc edib. Həmin məqalədə jurnalistlərin Rusiya hakimiyyət elitasının ən yaxın qohumlarının Putinin fərmanına əsasən səfərbər olaraq Ukraynaya müharibəyə getmək təklifinə verdikləri raksiyadan bəhs olunub.

Məqalədə öncəliklə Çeçen müharibəsi zamanı rus generallarından birinin dediyi iddia edilən ifadəni xatırladıblar: “İcazə verin, elitanın uşaqlarından ibarət bir kompaniya yığım, o zaman müharibə bir günə bitər”.

Jurnalistlər Rusiyanın müdafiə naziri Sergey Şoyqunun 32 yaşlı kürəkəni Aleksey Stolyarovu Nepala tətilə gedərkən yaxalayıblar. “Stolyarov səfərbərlik barədə sualı oxudu, lakin heç nə cavab vermədi”, deyə “Важные истории” nəşri qeyd edib.

Rusiya Təhlükəsizlik Şurası katibinin müavini Dmitri Medvedevin oğlu, 27 yaşlı İlya Medvedev isə “hərbi komissarlıqdan çağırış almadığını bildirib”.

Prezident administrasiyası rəhbərinin birinci müavini Sergey Kiriyenkonun (Kiriyenko Rusiya prezidenti Vladimir Putinin xələflərindən biri hesab olunur) kürəkəni, 33 yaşlı Andrey Uqniç “səfərbərliklə bağlı sualı eşidib və telefonu qapatıb”.

“Важные истории” nəşri yazır ki, Prezident Administrasiyası rəhbərinin digər müavini Aleksey Qromovun oğulları 30 yaşlı Aleksey və 27 yaşlı Danila da sualı dinlədikdən sonra teledonu qapadıblar.

Rusiyanın daxili işlər naziri Vladimir Kolokoltsevin oğlu 39 yaşlı Aleksandr Kolokoltsev isə müharibəyə getməyə hazır olduğunu bildirib: “Ölkəmin vətənpərvər vətəndaşı kimi, mən hər zaman onun müdafiəsinə hazıram. Məni hərbi xidmətə çağırsalar, əlbəttə ki, cəbhəyə gedəcəm. Bunun da olacağını istisna etmirəm”, deyə kiçik Kolokoltsev bildirib.