Erməni möcüzə ilə deyil, reallıqla hesablaşmalı olacaq...
“Dünyada şərəfdir yaşadan, milləti, fərdi...
Millət yoludur, haqq yoludur tutduğumuz yol,
Ey haqq, yaşa, ey sevgili millət, yaşa, var ol”

Tofiq Fikrətin bu məşhur sözləri sanki qürurla qeyd etdiyimiz Zəfər günü üçün yazılıb. Qələbəmizin ikinci ildönümü münasibətilə Azərbaycan prezidenti İlham Əliyevin də bu gün Şuşada etdiyi çıxışında millət olaraq ağır yükün, məğlub damğasının üzərimizdən götürüldüyünü və indi qalib xalq kimi yaşadığımızı xüsusilə vurğulaması, bir millət və fərd olaraq keçirdiyimiz hisslərin doğru izahı idi.

Dövlət başçısı qələbənin dəyərlərini qeyd etməklə yanaşı, birbaşa Ermənistana, onun beynəlxalq havadarlarına ciddi mesajlar verdi. Açığı, müharibədən sonra Qarabağ ətrafında yaranmış mövcud vəziyyətin cəmiyyətdə yaratdığı bəzi narahatlıqlara da bu mesajlar içərisində cavabların olduğunu deyə bilərik. İlk növbədə Azərbaycan prezidenti müharibədən sonra yaranmış vəziyyəti fürsət kimi dəyərləndirmək istəyən qüvvələri xəbərdar etdi. Azərbaycanın qələbə ilə arxayınlaşmadığını və ordunu gücləndirməkdə davam etdirdiyini, Silahlı Qüvvələrimizin iki il əvvəlkindən də güclü olduğunu vurğuladı və bu məqsədlə gələn ilin büdcəsində hərbi xərclərə daha artıq maliyyə ayrıldğını qeyd etdi. Yəni ki, biz eyforiyada deyilik və prezident məhz Ermənistanda revanşist qüvvələrin baş qaldırmasını, ermənilərin təxribatları davam etdirməsinin buna əsas verdiyini diqqətə çatdırdı.

Bu təxribatlardan biri Ruben Vardanyanın Rusiya tərəfindən Qarabağa konkret missiya ilə göndərilməsi olduğu məlumdur və cəmiyyətimizdə onun peyda olması ciddi narahatlıq yaratmasa da, şimal qonşumuzun hansı məkrli oyun oynayacağı müəyyən suallar yaradırdı. Ölkə rəhbərinin “əgər Ermənistan iqtidarlı, müxalifətli, o cümlədən xaricdən göndərilmiş və öyrədilmiş ünsürlər vasitəsilə yenidən üzərimizə gəlsələr bizim gücümüzü görəcəklər” mesajı, hələ də ikili oyun oynayan, iki stulda oturmaqla kifayətlənməyib üçüncü stula keçən Paşinyan iqtidarına, faktiki olaraq Rusiyadan idarə olunan əsas müxalif qüvvələrə və Qarabağa Rusiya tərəfindən “göndərilmiş və öyrədilmiş” Ruben Vardanyana və təbii ki, onun sahibinə, bu qüvvələrə inanan erməni cəmiyyətinə, konkret olaraq Qarabağ ermənilərinə ünvanlanmış ciddi xəbərdarlıq oldu.

Ermənistanın 10 noyabr bəyanatının müddəalarına sonunadək əməl etmədiyini qeyd edən dövlət başçısı bu öhdəliklərin yerinə yetirilməsi üçün zamanı süni şəkildə uzadan Ermənistana bir daha “səbrimiz tükənməz deyil” deməklə, “məğlubedilmiş ölkə özünü bu cür aparmamalıdır” xəbərdarlığını da etdi. Bu, o deməkdir ki, Moskva və Brüssel arasında iki ildir vurnuxan Ermənistan rəhbərliyi hər iki ölkənin xarici işlər nazirlərinin son Vaşinqton görüşündən düzgün nəticə çıxarmalı və sülh müqaviləsini imzalamaq üçün bir daha vaxt uzatmamalıdır. Zəngəzur dəhlizinin isə bir öhdəlik olduğunu, amma ermənilərin öhdəliyi yerinə yetirmədiyi də çıxışda öz əksini tapdı.

Şuşa çıxışında vacib məqamlardan biri, bəlkə də, hamımızı daha çox narahat edən Rusiya sülhməramlıların Azərbaycan ərazisində müddətinin nə vaxt bitəcəyinə aydınlıq gəlməsi oldu. Prezidentin Rusiya sülhməramlılarının müvəqqəti olaraq Azərbaycanda yerləşdiyini və onların ölkəmiziı tərk edəcəkləri müddətin məlum olduğunu xüsusi vurğulaması, həm Rusiyaya, həm də ona ümid edən separatçılara və ümumiyyətlə ermənilərə açıq bir mesaj və xəbərdarlıq oldu.

Məlumdur ki, Fransa Senatı 14 noyabrda Azərbaycana sanksiya tətbiq etmək üçün qətnamə qəbul edib hökümətə təqdim etməyi planlaşdırır. Həmin günə çox ümid bəsləyən erməni müxalifəti 10 minlik mitinq təşkil etmək çağırışı edib və düşünürlər ki, bununla da Qarabağ məsələsində öz xeyirlərinə dönüş etmiş olacaq və Azərbaycanı hansısa güzəştə məcbur edəcəklər. Dövlət başçısının sərt şəkildə Ermənistanın havadarlarının indiyədək cavablarının verildiyini və bundan sonra yenə “banlayarlarsa” cavablarının veriləcəyini deməsi böyük ehtimalla Fransaya yönəldiyi şübhə doğurmur. (Fransızların xoruzu simvol hesab etməsini nəzərə alsaq, ünvanın kim olduğu çətinlik yaratmır) Əlavə olaarq, bu mesajın davamı havadarın kim olmağının fərq etmədiyinə işarədir.

Eyni zamanda, birbaşa adı çəkilməsə də ( ümumiyyətlə prezidentin çıxışında konkret adlar, ünvanlar göstərilməsə də, hədəflər bəllidir) İrana da çox sərt mesajlar verildi. Prezidentin “bizim sərhəd yaxınlığında hərbi təlim keçirənlər bilsinlər ki, bunun Ermənistana dəstək məqsədi daşıdığını bilirik” və məscidləri dağıdanlarla qucaqlaşanların necə bir saxtakarlıq nümayiş etdirdiklərini vurğulaması da İrana olan ciddi bir cavab və mesaj oldu.

Ermənilər tarixən öz problemlərini heç vaxt özləri həll etməyiblər, çalışıblar ki, böyük qüvvələrə, satqınlıq, casusluq edib, onların gücü ilə milli məsələlərini həll etsinlər. İndi də elədir və ermənilərin zamanı süni şəkildə uzatması hansısa beynəlxalq şəraitin onların xeyrinə dəyişəcəyinə, Qərbin və ya Rusiyanın onların əvəzinə vuruşacaqlarına hesablanıb. Azərbaycan prezidenti onların bu xarakterinə işarə vurub erməni cəmiyyətinə müraciətlə bildirdi ki, “möcüzə gözləməsinlər, heç kim onların yerinə gəlib vuruşamaycaq”.

Azərbaycan yüksək səviyyədə qarşı tərəfə iradlarını bildirməsi problemin həllini sürətləndirib. Bu, dəfələrlə praktikada sübut olunub. Azərbaycan prezidentinin Şuşa çıxışından sonra Ermənistan da, məlum havadarları da öz hesablarını götürəcək və möcüzə ilə deyil, reallıqla barışmağa məcbur olacaqlar.

İlham İsmayıl //moderator.az//