Ermənistan yeni müharibəyə hazırlaşır. TEREF.AZ xatırladır ki, bu barədə Ermənistanın müdafiə naziri Suren Papikyan açıqlama verib.

Papikyan bəyan edib ki, Ermənistan silahlı qüvvələrinin də üzərində formalaşdığı Sovet-Rusiya hərbi məktəbi II Qarabağ müharibəsində özünün effektsizliyini nümayiş etdirdi. Suren Papikyan bildirib ki, 2020-ci ilin payızında baş tutmuş 44 günlük müharibə gəldiyi qənaətin doğru olduğunu göstərir.

“Qələbə qazanmaq üçün bir neçə vacib amili bir araya gəlməlidir. Bu, müasir silahlar, daim yenilənən kəşfiyyatın mövcudluğu, şəxsi heyət arasında müasir taktika biliklərinin olması. Təəssüflə etiraf etməliyik ki, yuxarıda qeyd etdiyim məqamların heç biri bizdə yox idi. Bir neçə elit bölmə istisna olmaqla, şəxsi heyətimiz beşinci nəsil müharibəsinin nə olduğunu bilmirdi”, - deyə Suren Papikyan vurğulayıb.

Ermənistanın müdafiə naziri Suren Papikyan növbəti müharibənin anonsunu da verib. O bildirib ki, Ermənistan ordusunun müharibədən çıxardığı nəticələri əsas götürərək gələcək müharibəyə hazırlaşmalıdır: “Dəfələrlə yazdığım kimi, proses işə salınıb və yubanma ölümcül nəticələrə səbəb ola bilər. Müstəqil dövlətə sahib olmaq istəyiriksə, çox çalışmalıyıq”.

Azərbaycanla Ermənistan arasında sülh danışıqlarının getdyi, hətta bir vaxtda müdafiə naziri Papikyanın hərbi ritorikanı yenidən gücləndirirək müharibəyə hazırlıqdan danışması prosesi poza biləcək addımdır. Qeyd edək ki, hələ 2019-cu ildə Ermənistanın sabiq müdafiə naziri David Tonoyanın Azərbaycana qarşı "yeni müharibə, yeni ərazilər" tezisini irəli sürməsi 2020-ci ilin sentyabr ayında 44 günlük müharibənin başlanmasına gətirib çıxartdı. Bu baxımdan, Ermənistanın maliyyə resurslarının müasir silahlar almaq və yeni, güclü ordu yaratmaq üçün yetərli olmadığını nəzərə alsaq, Papikyanın sözləri daha çox təxribat kimi qiymətləndirilə bilər. Amma istənilən halda vəziyyətin gərginləşməsi bölgədə eskalasiyanı artırır ki, bu da sülh prosesinə zərbə vurur.

Milli Cəbhə Partiyasının sədr müavini, politoloq Məhəmməd Əsədullazadə Cebhe.info-ya açıqlamasında bildirib ki, Ermənistanın sülh danışıqları apardığı bir vaxtda Papikyanın bu cür açıqlaması çıxış etməsi rəsmi İrəvanın qeyri-konstruktiv mövqeyindən xəbər verir: "Bu, Ermənistanın ikili standartlardan çıxış etdiyini, imitasiya siyasəti yürütdüyünü və 44 günlük müharibədən sonra Cənubi Qafqazda yaranmış yeni geosiyasi reallıqları qəbul etmədiyini göstərir. Ermənistan bir tərəfdən sülh danışıqları aparmaqla vaxt qazanmağa, müasir silahlar əldə etməyə və ordunu taktiki səviyyədə yenidən hazırlamağa çalışır. Onlar Azərbaycanın guya Ermənistan ərazisinə daxil olduğunu iddia etməklə danışıqlarda imitasiya edir. Müdafiə naziri Papikyanın Hindistan, İran və digər ölkələrlə hərbi-texniki əməkdaşlıq haqqında saziş imzalaması, hətta Hindistandan reaktiv yaylım atəşi sistemlərinin alınması Ermənistanda revanşist qrupların sülh müqaviləsində maraqlı olmadığını təsdiq edir. Ola bilsin ki, Nikol Paşinyan sülh sazişinin imzalanmasında maraqlıdır. Lakin komandasındakı revanşistlər bunu istəmirlər. Hesab edirəm ki, Ermənistanın növbəti addımları bu ölkənin faciəsinə gətirib çıxaracaq. Ermənistan bir-iki raket sistemi və ya dron almaqla Azərbaycan üzərində nəticə əldə edə bilməz. Həmçinin, Ermənistan ordusunun şəxsi heyəti döyüş qabiliyyətinə malik deyil. Müharibə aparmaq artilleriya sistemlərindən ibarət deyil. Ordunun yüksək döyüş hazırlığı qabiliyyəti olmalıdır. İkinci Qarabağ müharibəsində Şuşa uğrunda gedən qanlı döyüşlər göstərdi ki, Azərbaycan Ordusunun xüsusi təyinatlı qüvvələri atıcı silahlarla Ermənistanın zirehli texnikasına qalib gəldi. Ermənistan ordusu Şuşa uğrunda döyüşlərdə min nəfərdən artıq itki verib. Bu, onu göstərir ki, müharibə yalnız müasir silahların alınması ilə yekunlaşmır, həm də şəxsi heyətin mənəvi-psixoloji vəziyyəti, ruh yüksəkliyindən çox asılıdır”.

O bildirib ki, Azərbaycan Ordusu Ermənistan tərəfinə psixoloji zərbə vurub:

“Suren Papikyanın açıqlamasından nəticə çıxartmaq lazımdır. Yəni Azərbaycan sülh danışıqları aparır, amma Ermənistana da etibar etmək olmaz. Azərbaycan da hərbi büdcəsini artırır, müasir silahlar alır, yeni komando qüvvələri yaradıb, milli müdafiə sənayesi silahlar istehsal edir. Amma Ermənistanın geosiyasi şərtləri dəyişməsi və 2020-ci ilin əvvəlindəki status-kvonu bərpa etməsi də mümkün deyil. Ola bilsin ki, Ermənistan döyüşlərdə taktiki üstünlük əldə edib Azərbaycana nə isə diqtə etməyi planlaşdırır. Lakin bu, Ermənistanın yeni ərazilər itirməsi ilə nəticələnəcək. Azərbaycan Ermənistan ordusunun Qarabağdakı qalıqlarını da hərbi əməliyyatlar yolu ilə təmizləməlidir. Bu ilin sonuna qədər sülh sazişi imzalanmayacaq. Gələn il sülhün əldə olunması üçün ABŞ və Avropa İttifaqı Ermənistana təzyiq etməlidir. İrəvan isə ikili standartlar nümayiş etdirir. Müdafiə naziri Suren Papikyanın açıqlaması Ermənistanın müharibəyə hazırlaşdığını göstərir. Müharibə başlanarsa, Azərbaycan Zəngəzur dəhlizini aça bilər".