Rusiya sülhməramlı kontingentinin komandanlığı da son zamanlar neytrallığını tamamilə unudaraq seperatçı reimə aşkar dəstək verməsi, Xankəndinə bizə qarşı mitinq keçirilməsinə şərait yaratması, Laçın dəhlizi ilə Qarabağa silah daşınmasında iştirak etməsi və s. Azərbaycan üçün tamamilə qəbuledilməzdir. Odur ki, rus sülhməramlı kontingentinin Azərbaycandan müddətin sonunda və ya bu müddətdən daha əvvəl çıxarılması məsələsi yenidən aktuallaşıb. İctimaiyyətdə isə bu barədə yaranan bəzi şübhələrə qısaca aydınlıq gətirilməsinə də ehtiyac yaranıb.

Bu ilin iyun ayına kimi erməni silahlılarının Azərbaycan ərazilərin çıxarılacağına söz verən Rusiya Müdafiə Nazirliyi, sanki general Volkova Qarabağda vəziyyəti gərginləşdirəcək addımlar atmağı tapşırıb. Daha əvvəl sülhməramlıların iştirakı ilə Şuşakənddə erməni silahlılarının mühəndis texnikası ilə müdafiə qurğuları və səngərlər inşa etməsini, həm sülhməramlı kontingentin hərbi qulluqçularının Laçın dəhlizində talançılıqla məşğul olmasını, həm dəfələrlə erməni silahlılarının Qarabağda atəşkəsi pozmasını, həm də sülhməramlı kontingentin Ağdam-Əsgəran yolu və Laçın dəhlizi ilə Qarabağa silah daşımasını unutmadıq. Silah daşınması bu günə qədər də davam edir. Rusiya Müdafiə Nazirliyi hələ də 10 noyabr 2020-ci il tarixli razılaşmalara uyğun olaraq Ermənistan qoşunlarının Qarabağdan çıxarılmasını təmin etmək vədini niyə yerinə yetirmədiyinə aydınlıq gətirməyib. Ermənistan Təhlükəsizlik Şurasının katibi Armen Qriqoryan “Qarabağda Ermənistandan çağırışçı olmayacaq” cümləsi də “Qarabağda Ermənistan ordusunun şəxsi heyəti, texnikası və silahı yoxdur” mənasını daşımır. Bu açıqlama Ermənistanın növbəti “Dəmir Yumruq” zərbəsindən yayınmaq üçün səsləndirilib.

Görünən odur ki, rus sülhməramlıları Ermənistan qoşunlarını, erməni silahlılarını, onların silah və texnikalarını Azərbaycan ərazisindən çıxarmaq niyyətində deyil. O zaman sual yaranır: Belə bir amluada rus sülhməramlıları Azərbaycan lazımdırmı? Bəlkə yuxarıda adı çəkilən ziyanlı və silahlı ünsürlərin Azərbaycan ərazisindən çıxarılmasını və ərazilərimizin təmizlənməsini Fərruxda, Qırxqızda, Sarıbabada, Laçında, Zabuxda, Susda və Buzduxda olduğu kimi, özümüz həyata keçirək?

Baş verən proseslər göstərir ki, hazırda erməni silahlılarının Qarabağda mövcudluğunun zəmanətçisi rus sülhməramlılarıdır. Belə bir sülhməramlı missiya isə Azərbaycana artıq lazım deyil. Deməli rus kontingentinin ərazilərimizdən çıxarılması məsələsi mütləq müzakirə olunmalıdır.

Azərbaycan daha zəif olduğu 1990 və 1992-ci ildə, sonra isə 2012-ci ildə daha ciddi silahlanmaya malik Rusiya ordusunu ərazisindən çıxara bildisə, 2020-ci ildə Rusiya faktorunu sıfırlayıb Vətən Müharibəsində Qələbə qazanaraq Ermənistanı işlanmış və zorlanmış dilənçi toyuğa döndərə bildisə, deməli rəsmi Bakı 2025-ci ilin sonuna qədər də daha zəif və mandatsız rus sülhməramlılarını Qarabağdan daha rahat şəkildə evlərinə yola sala biləcək. İlk addım isə Azərbaycanın Laçın dəhlizinə nəzarəti ruslardan geri alması olacaq, çünki bu dəhliz sülhməramlılar tərəfindən təyinatı üzrə deyil, Qarabağdakı erməni silahlılarının silahlanması və revanşa hazırlanması üçün istifadə edilir.

Seperatçı rejimin və işğalçı ölkənin silahlanmasının, həmçinin Azərbaycan Silahlı Qüvvələrinin şəxsi heyətinin təhlükəsizliyinə qarşı yaranan təhdidlərin aradan qaldırılması, zərurət yaranarsa təhlükəsizlik zonasının daha geniş ərazidə yaradılması üçün perventiv tədbirlərin də həyata keçirilməsi istisna deyil.

Bütün bu fəaliyyətlər, o cümlədən rus sülhməramlılarının evlərinə yola salınması Qələbənin bizə verdiyi hərbi, siyasi, diplomatik və mənəvi üstünlüklər nəticəsində tamamilə mümkündür və buna mənim şəxsən heç bir şübhəm olmayıb, yoxdur və olmayacaq.

Ədalət Verdiyev, hərbi ekspert //moderator.az//