Azərbaycan tarixində belə bir şey olmayıb ki, adam qətl törətsin və əhalinin az qala 80-90 faizi onu müdafiə etsin...
Niyə belədir? Çünki Rəşad Dağlı bu qətli törətməyə sürükləyən amil hər kəsi narahat edir, hamını düşündürür. Sirr deyil ki, Azərbaycanda narkotik alveri ciddi şəbəkəyə sahibdir. Bu, son dərəcə geniş yayılmış sosial bəladır. Elə hörmətli ailələrin uşaqları narkotikə qurşanır ki, heyrətdən insanın əli üzündə qalır. Heç cür inana bilmirsən ki, filankəsin oğlu, hətta qızı narkotikin əsirinə çevrilib...
Bəli, Rəşad Dağlı Azərbaycan gəncliyini narkotikin əsarətindən xilas etmək üçün səsləndirdiyi güllə kimi dəlib keçən sərrast fikirlərin güdazına gedib. Övladının gələcəyini düşünən, buna görə narahat olan hər bir ata, ana narkotikaya qarşı apardığı barışmaz mübarizəyə görə Rəşada minnətdardır. Çox vaxt valideynlərin həll edə bilmədiyi problemi Rəşad Dağlı gənclər arasında olan avtoriteti hesabına yoluna qoyub.
Rəşad Dağlının hər şeyi var: Pulu, parası, adı, sanı. Xalq arasında ağlasığmaz həddə hörməti. Belə şeyləri pulla qazanmaq olmur. Rəşad Dağlı bütün bunları öz insanlığı ilə qazanıb. Sadəliyi, təvazökarlığı ilə seçilib. Bu nüfuzu qazanmaq üçün o, o qədər şeylərdən imtina edib ki...
Mən Azərbaycan iqtidarına səslənirəm. Rəşad Dağlı narkotik ticarətinə qarşı mübarizə aparmalı deyil. O, bir insan kimi bu missiyanı öz üzərinə götürmək məcburiyyətində qalıb. Çünki Azərbaycan hökuməti bu işə barmaqarası baxır. O da bəllidir ki, iri buynuzlu məmurların arasında narko-ticarətə "krişalıq" edən alçaqlar var. Onlara arxalanan narko-tacirlər Azərbaycanda at oynadır. İş o yerə çatıb ki, 1 manata belə Azərbaycanda narkotik almaq olar. Hətta orta məktəblərdə oxuyan şagirdlərə də narkotik satan şərəfsizlər var. Rəşad Dağlı bunları sadəcə gözü ilə görməyib, həm də bütün varlığı ilə bu faciənin ağrısını yaşayıb.
Düşünürəm ki, Azərbaycan iqtidarı Rəşad Dağlı ilə bağlı məsələyə xüsusi diqqət ayırmalıdır. Ən önəmlisi, Rəşad Dağlının narko-tacirlərin qəzəbindən qorumaq lazımdır. Hökumət başa düşməlidir ki, Rəşad Dağlı məsələsi sıradan bir cinayət hadisəsi deyil.
Mən kriminal dünyanın nüfuzlu şəxslərinə də üz tuturam: Nə qədər ki, Rəşad Dağlı dörd divar arasındadır, ona xalqın sizə əmanəti kimi baxın. Düzdür, Rəşad Dağlının zindanlarda da xüsusi nüfuzu var. Ancaq narko-tacirlərin əli çox uzundur, onlardan hər cür alçaqlıq gözləmək olar...
Elbəyi Həsənli
Teref.az