“Naxçıvan bir tərəfdən İran, bir tərəfdən Böyük Ermənistanla həmsərhəddir. Türkiyə ilə isə cəmi 11 km. sərhədi var”.
Milli Məclisin deputatı, hüquq elmləri doktoru Siyavuş Novruzov Naxçıvan MR-in statusunu şərh edərkən belə deyib.
Vasif Talıbovun sözçüsü olan bu adamın məntiqindən belə çıxır ki, Naxçıvan həmsərhəd olduğu dövlətlərdən sərhədlərinin uzunluğuna nisbətində asılı olmalıdır. İran Naxçıvanla 204 km həmsərhəd olduğu üçün, görünür, deputat da ona sadəcə İran deyib. Ermənistanın Naxçıvanla 246 km. sərhədi var. Ən uzun sərhədə malik olduğuna görə, Ermənistan deputatın gözünə “Böyük Ermənistan” kimi görünür. Türkiyənin isə Muxtar Respublika ilə “cəmi 11 km”. sərhədi var. Odur ki, Türkiyə ilə münasibətlərimizin də ölçüsü cəmi 11 km-lik olmalıdır.
Deputatın düşünüb açıq şəkildə deməyi yaddan çıxardığı məsələ isə Azərbaycanla bağlıdır. Zira Naxçıvanla Azərbaycanın digər hissəsi arasında ümumiyyətlə ərazi bağlantısı, yəni sərhədi yoxdur. Siyavuş Novruzovun məntiqindən belə çıxır ki, Azərbaycanla “sərhədi” olmadığı görə Naxçıvanın ümumiyyətlə ona heç bir aidiyyəti də ola bilməz və bu, Naxçıvanın muxtar statusunun məntiqi əsasını təşkil edir.
Siyavuş Novruzovun fikrincə, onun sözçüsü olduğu “xan” həzrətlərinin xoruz banı eşitməyən bu fəlsəfəsini qəbul etməyən hər kəs erməni dəyirmanına su tökür və vətən xainidir.
“Xan” həzrətlərinin dərin məhəbbətlə sevdiyi İranlılar demişkən, “xeyli xub”. Bəs, Naxçıvanın təmsilçisi olan Siyavuş Novruzov, Eldar İbrahimov, İsa Həbibbəyli, Vasif Talıbov kimi elm dəryaları Azərbaycan MM-də niyə at oynadırlar? Təklif edirəm ki, Naxçıvandan “seçilmiş” bütün deputatları “Böyük Ermənistan"a göndərək, Ermənistan Milli Məclisində Naxçıvanı təmsil etsinlər. Necə olsa, Ermənistan Naxçıvanla ən uzun sərhədə malikdir və bu
deputatlar eynilə sələfləri Nəriman Nərimanov kimi ermənilərin nəfinə düşünürlər.
Heydər Oğuz
Teref.az