İranın Naxçıvandakı baş konsulu Seyid Əhməd Hüseyni Naxçıvan MR Ali məclisinin sədrinin birinci müavini Azər Zeynalov ilə telefonla danışıb.
Baş Konsulluğunun yaydığı məlumata görə, telefon danışığı zamanı İran ilə Naxçıvan arasında əməkdaşlıq perspektivləri və Naxçıvanda yaşayan İran vətəndaşlarının konsul-hüquq məsələləri müzakirə edilib.
Maraqlıdır, İran açıq şəkildə Naxçıvan üzərindən Azərbaycana təzyiq etdiyi bir zamanda Vasif “xan”ın “Boz kardinalı” İran rəsmisi ilə hansı əməkdaşlıq perspektivini müzakirə edir? Olmaya “İranın Naxçıvanı” layihəsi masaya yatırılıb? Özü də o zaman ki, Azərbaycan Prezidenti İlham Əliyev Cənub problemini dilə gətirdiyi bir zamanda. Niyə İlham Əliyev Yunanıstan səfirini qapısını qovanda Naxçıvanın Bakıdakı Daimi nümayəndəsi Bəxtiyar Əsgərov həmin diplomatla görüşüb "iki ölkə arasında dostluq münasibətlərini artırmağı" müzakirə etdiyi kimi, Naxçıvanın "böz kardinalı"nın İranla eyni məzmunlu telefon danışığı məhz bu cür kritik dövrə düşür? Ümumiyyətlə "Boz kardinal"ın bu diplomatik təşəbbüsündən Azərbaycan XİN-in xəbəri varmı? Yoxsa bu kimi məsələlərə Naxçıvan "xan"ı qərar verir?
Ümidvaram ki, Azərbaycan XİN bizi narahat edən bu suallara qaneedici cavab verəcək.
Heydər Oğuz
Teref.az