"Təhlükəsiz şəhər": - 7 min kamera cinayətkarlıqla mübarizəyə necə kömək edir?

30-03-2023, 12:22           
"Təhlükəsiz şəhər": -
Cinayətkarlıqla mübarizədə və ictimai təhlükəsizliyin qorunmasında "Təhlükəsiz şəhər" sistemi müasir tələblərə cavab verirmi? Şəhərdəki müşahidə kameralarının maskada olan şəxsi identifikasiya etmək imkanı varmı?

Bu sualları Azərbaycan İnternet Forumun prezidenti Osman Gündüz verib.

O. Gündüz "Bravo"da baş verən cinayətin açılmasında Daxili İşlər Nazirliyinin (DİN) texnologiyalardan, rəqəmsal resurslardan, "Təhlükəsiz şəhər" sistemindən peşəkarlıqla istifadəsi haqqında bir neçə gün öncə fikir bildirib və deputat Fazil Mustafaya qarşı törədilən terror bir daha bu məsələyə diqqət yetirməsinə səbəb olub.

Forum prezidenti xatırladıb ki, ölkəmizdə "Təhlükəsiz şəhər" sistemi 2009-cu ildən fəaliyyət göstərir. Bu sistem daxilində biometrik identifikasiya, videomüşahidə, müxtəlif tip alt sistemləri mövcuddur. Kameralar həm də kütlə içərisindən yalnız axtarılan şəxsi seçməyə, izləməyə imkan verir, hətta saxta nömrə ilə hərəkət edən avtomobili və sahibini identifikasiya etmək və izləmək imkanı və s. var.

Bununla bağlı Azərbaycan prezidentinin 15 May 2009-cu il tarixli fərmanı və Nazirlər Kabinetinin (NK) 2010-cu ildə qəbul etdiyi qərarları mövcuddur.

O. Gündüz deyib ki, videomüşahidə kameralarının quraşdırılacağı məkanlar, bu işə məsul qurumlar, bu işin reallaşmasına ayrılan vəsaitlərlə bağlı NK-nin qərarına bir neçə dəfə əlavələr də edilib:

“Əvvəllər DİN-nin müşahidə kameraları yalnız əhalinin sıx hərəkətdə olduğu küçə və prospektlərdə, parklarda, idman kompekslərində quraşdırılırdı. Amma yuxarıda qeyd olunan qərara edilən dəyişikliklərdən sona müşahidə kameralarının sayı və keyfiyyəti xeyli artırılıb.

Son məlumatlara görə, Bakı şəhərində "Təhlükəsiz şəhər" sistemində, təxminən 2300 nöqtədə 7 min müşahidə kamerası istifadəyə verilib. İnkişaf etmiş ölkələrdə isə müşahidə perimetrinə daxil olan ərazilər, hər 100 nəfərə düşən kamera sayı hədsiz yüksəkdir”.

O. Gündüzün sözlərinə görə, beynəlxalq təcrübəni, inkişaf etmiş ölkələrdə bu istiqamətdə atılan addımları müşahidə etdikdə görmək olar ki, ictimai təhlükəsizliyin qorunması və cinayətkarlığa qarşı mübarizədə "Təhlükəsiz şəhər" sisteminin təkmilləşdirilməsinə ciddi ehtiyac var:

"Təhlükəsiz şəhər" sisteminin əsas tərkib hissəsi olan videomüşahidə infrastrukturunun qurulması mövcud normalara görə DİN, FHN, yerli icra qurumları, Dövlət Şəhərsalma və Arxitektura Komitəsinə həvalə edilib. Lakin görünən odur ki, bu infrasturkturun inkişafı və dayanıqlığı ilə bağlı çatışmazlıqlar da var.

Baş verənlər və müasir çağırışlar da tələb edir ki, "Təhlükəsiz şəhər"in əhatə dairəsi genişləndirilməli, bu məqsədlə “Yol xəritəsi” hazırlanmalıdır. Yeni tikilən binaların, obyektlərin təhvil-təslimində "Təhlükəsiz şəhər"ə qoşulan videomüşahidə sisteminin mövcudluğu təmin edilməlidir. Qaydalar bunu tələb etsə də, icrası istiqamətində problemlər var. Bu sistemin operatoru olan DİN bu prosesdə daha yaxından iştirak etməlidir.

Yeri gəlmişkən, yeni tikililərdə telekommunikasiya və videomüşahidə sisteminin mövcudluğu və istismarı ilə bağlı qanunvericiliyə dəyişikliklər edilməlidir”.

Forum prezidenti əlavə edib ki, müasir dünyanın çağırışlarına uyğun olaraq "Təhlükəsiz şəhər" sisteminə
hətta maskada olan cinayətkarları identifikasiya etməyə imkan verən müasir videomüşahidə sistemləri, təmassız biometrik texnologiyalar da quraşdırılmalıdır:

“İnkişaf etmiş ölkələr terrorçuluğa qarşı mübarizədə, identifikasiya məsələlərində süni intellekt həllərindən istifadəyə daha çox önəm verirlər. Bu təcrübələrin öyrənilməsi və ölkəmizdə tətbiqinə diqqət artırılmalıdır.

"Təhlükəsiz şəhər" sisteminin modernləşdirilməsi, yeni texnologiyaların tətbiqi, kameralardan məlumatların ötürülməsi üçün optik şəbəkənin inkişafı, məlumatların emal edilməsi üçün Data Mərkəzin gücünün artırılması, digər təhlükəsizlik sistemləri ilə inteqrasiya böyük resurslar və peşəkar kadrlar tələb edir. Dünyada, eləcə də son zamanlar ölkəmizdə baş verənlər və beynəlxalq təcrübədə göstərir ki, "Təhlükəsiz şəhər" tipli sistemlər ictimai təhlükəsizliyin qorunması üçün mühüm əhəmiyyət kəsb edir.

Odur ki, hökumətin bu məsələləri yenidən gündəmə gətirməsi, resurslar ayırması və təhlükəsizlik sistemlərinin təkmilləşdirilməsinə xüsusi diqqət yetirməsi faydalı olardı”.

O. Gündüz sonda əlavə edib ki, videomüşahidə sistemləri ilə toplanan informasiyaların qorunması və bu məlumatlardan sui-istifadə hallarının qarşısının alınması üçün də qanunvericiliyin təkmilləşdirilməsi vacibdir.
Reyting.az












Teref.az © 2015
TEREF - XOCANIN BLOQU günün siyasi və sosial hadisələrinə münasibət bildirən bir şəxsi BLOQDUR. Heç bir MEDİA statusuna və jurnalist hüquqlarına iddialı olmayan ictimai fəal olaraq hadisələrə şəxsi münasibətimizi bildirərərkən, sosial media məlumatlarındanda istifadə edirik! Nurəddin Xoca
Məlumat internet səhifələrində istifadə edildikdə müvafiq keçidin qoyulması mütləqdir.
E-mail: n_alp@mail.ru