Qəzvin şəhərindən bir az aralıda, Elbrus dağının zirvəsində qartal yuvası mənasını daşıyan Əlamut ismaililərin alınmaz qalası idi. Xaşxaşilərin lideri Həsən Səbbahın özü də burada dəfn olunub. Onun yetirmələri islam içində ilk cihadçı-kamikadze, ilk sui-qəsdçilər sayılır. Şiə məzhəbində cəfərilər və ismaililər qolları ayrılanda ortaya Sabbahın Əlamut qalasında sui-qəsdçilər hazırlaması başlanır. Onlar Səlcuk imperatorunun baş vəziri Nizammülkdən tutmuş Bavariya kralına qədər məhz sui-qəsd yolu ilə öldürüblər. Bir sözlə, islam dini adı altında ilk terrorçu hərəkatı İran ərazisində yaradılıb. Və onların üslubu məhz sui-qəsd idi, kütləvi qırğın törətmək kimi bir adətləri olmayıb. Həşşaşilər bir nəfəri hədəf götürür, onu təqib edir və sonda xəncərlə öldürürdülər. Ona görə də Azərbaycanın Tehrandakı səfirliyinə "Kalaşnikov"la hücum, Əhmədlidə "Bravo"nun içindəki inkassatora yenə eyni silahla basqın, ən nəhayət, deputat Fazil Mustafanın həmin avtomatla güllələnməsi İranın həşşaşilərdən qalan üslubunu gözlər önünə sərir. Bəli, Əlamut qalasından başlayaraq bu günə kimi İranın terror metodu tək-tək hədəfə almaqdır. Bura akademik Ziya Bünyadovun qətlini, yazıçı Rafiq Tağının bıçaqlanmasını da əlavə etmək olar. Hətta Salman Rüşdi də dəfələrlə sui-qəsdə məruz qalıb. İndisə biz İranın SEPAH (islam inqilabçıları keşikçiləri) strukturu tərəfindən xain hücuma məruz qalmaqdayıq. Bu güc strukturunun artıq dünyada terror təşkilatı kimi tanınmasına hazırlıq gedir. Onlar birbaşa ali dini liderə tabedir, yəni hökuməti eşitmirlər. SEPAH-ın Qüds komandanı Qasim Süleymani də Bağdadda partladılanda İran rejiminə onun öz dili ilə cavab verilmişdi. Anaxeber.info yazır ki, sadaladığımız bu nümunələr Azərbaycanın İran rejiminin terror hücumlarına məruz qaldığını isbatlayır. Sonuncu hadisəni də bu qəbildən saymaq tamamilə mümkündür. Çünki toxunulmaz ərazi sayılan səfirliyimizi gülləbaran etdirən və terrorçunu dəlixanaya salıb hadisəni məişət zəminində təqdim edən bir rejimdən toxunulmazlıq statusu olan deputata da sui-qəsd planlaşdırması təəccüblü deyil. Üstəgəl, Fazil Mustafa təsadüf seçilməyib, onun İran rejimi əleyhinə ardıcıl, sərt çıxışları olurdu. Eyni zamanda, Azərbaycan Xarici İşlər Nazirliyi də rəsmi şəkildə açıqladı ki, istintaqın ilkin nəticələri terrorda İran izinə dəlalət edir. Kəsəsi, rəsmi Bakı İranın terror törətdiyini bəyan etdi. Sözsüz ki, hadisənin İsraildə səfirliyimiz açılan ərəfədə baş verməsi də təsadüf deyil. İran rejimi tutuquşu kimi eyni ittihamı səsləndirir - sərhədlərsə guya sionist rejimi mövcuddur. Eləcə də Tel-Əvivdə səfirliyimiz açılmaqla yanaşı, Bakıda İsrailin kibertəhlükəsizlik mərkəzi fəaliyyətə başlayıb. Bütün bunlar İran rejimini təşvişə salmamalıdır. Çünki İsraillə dostluğumuz onlara qarşı yönəlməyib. Biz Qarabağda gedən müharibədə yəhudi dövlətinin dəstəyini görərkən, din qardaşı bildiyimiz İran ermənilərə kömək edirdi. Bəs, İran niyə bizə terror edir? Səbəb sadədir - qorxutmaq, göz dağı vermək, Zəngəzur dəhlizi məsələsində, İsraillə münasibətlərdə geri çəkilmək, Tehranın arzularını ifadə etmək, regionda Türkiyənin varlığını əngəlləmək...Amma bu təhdidlər nəticəsiz qalacaq. İlk növbədə Şuşa bəyannaməsi var. Odur ki, SEPAH-ın bizi terror etməsinə, teleqram kanallarında video çarxlarla mesaj verməsinə, sərhədlərimizdə hərbi təlimlər keçirməsinə, Naxçıvanla sərhəddə qoşunlar yığmasına baxmayaraq, İran rejimi bizə bata bilməz. Çünki ona qarşı formalaşan beynəlxalq koalisiyanı hərəkətə keçməyə təhrik etmiş olacaq. Ötən həftəsonu Xarici İşlər Nazirliyi ilə paralel müdafiə naziri Zakir Həsənov da Tehrana xəbərdarlıq etdi. General polkovnik ad çəkmədən işarə vurdu ki, kimsə bizimlə təhdid dilində danışa bilməz və başqa ölkələrin hərbçilərinin səsləndirdiyi ittihamlar qəbuledilməzdir. Beləliklə, İran hərtərəfli təhdid və hədə üslubuna keçsə də, terrora başlasa da, bunun effekti olmayacaq. Ölkədə casus şəbəkəsinin çökdürülməsi prosesi gedir və gedişat İranla diplomatik əlaqələrin tamamilə kəsiləcəyinə aparır. Son olaraq Tehranın Bakıya nota verməsi, guya mediada İranın təhqir olunduğunu iddia etmələri, İran XİN sözçüsü Nəsir Kənanidən bizə qarşı səslənən ittihamlar, Təbrizdəki Baş konsulluğumuz qarşısında aksiya təşkil edib bağlanmasını tələb etmələri molla rejiminin düşmənçiliyini göstərir. Fazil Mustafaya terror isə səbr kasasını daşıran hadisə oldu. Amma İran rejimi anlamalıdır ki, bu addımları Qərbin İranı vurmasını tezləşdirir. Üstəlik, regionda açılacaq yeni cəbhə İranın müttəfiqi Rusiyaya qəti şəkildə sərf etmir. Lavrov ona görə iranlı həmkarı Abdullahianla görüşdə açıqladı ki, Bakı-Tehran gərginliyinin müvəqqəti xarakter daşıdığına ümid bəsləyir və Moskva da vasitəçi olmağa hazırdır. Xülasə, regionda cərəyan edən geosiyasi proseslərin hər bir detalı İran əleyhinədir. Qorxulu Tehran isə ağlını başına yığmasa, ABŞ və İsrail onu İraqın, Əfqanıstanın gününə sala bilərlər. Azərbaycan isə müharibənin əleyhinədir, biz dostluq və əməkdaşlıq tərəfdarıyıq. Bizim addımlarımız İrana qarşı deyil və bölgədə altılıq platformasını dəstəkləyən 3 ölkədən biriyik...

Azər Talıbov
Anaxeber.info