Azərbaycanlı milyarder Fərhad Əhmədovun başının üzərini qara buludlar alıb. “Forbes”in məlum siyahısında həmişə rusiyalı kimi təqdim olunan iş adamı ictimai yerlərdə görünmür. Əhmədovun harada olduğu bilinmir. Prodüser İosif Priqojinlə söhbətinin səs yazısı aləmi bir-birinə vurub. Haqqında ağır ifadələr işlətdiyi Rusiya Prezidenti Vladimir Putinin onu cəzalandıracağı, bəlkə də, artıq cəzalandırdığı bildirilir.
TEREF.AZ Bizimyol.info-ya istinadla xəbər verir ki, “Forbes” Fərhad Əhmədovun 1.7 milyard dollar sərvəti olduğuna əmindir. Jurnal onu dünyanın 2337-ci zəngin insanı hesab edir. Amma azərbaycanlı milyarder bu yerə asanlıqla çatmayıb. Fərhad Əhmədov bir çox qalmaqalların mərkəzində olub. Təkcə onun “Qazprom” və həyat yoldaşı ilə məhkəmə çəkişmələrini xatırlamaq kifayətdir.

Əhmədov karyerasına 1980-ci illərin sonlarında London əmtəə birjasında samur ticarəti ilə başlayıb, lakin tezliklə təbii qaz sənayesində özünə yer tapıb. Onun yaratdığı “Tansley Trading” Rusiyanın bir sıra təbii qaz şirkətlərini, o cümlədən “Qazprom”u avadanlıqlarla təmin edirdi.

90-cı illərin əvvəllərində Əhmədov Yamalo-Nenets inzibati rayonunda Severo-Urenqoyskoye yatağının işlənməsi üçün “Qazprom” və ABŞ-ın “Bechtel Energy” şirkətlərinin birgə yaratdığı “Northgas”da pay aldı. İş adamı zaman keçdikcə “Qazprom”la heç cür ümumi dil tapa bilmədi. Dövlət şirkəti ilə qarşılıqlı ittihamlar başladı. İş məhkəmə zallarına gedib çıxdı.

2018-ci ildə ABŞ Maliyyə Nazirliyi “Kreml hesabatı” adlandırdığı siyahıda azərbaycanlı milyarderin adına da yer vermişdi. Buradakı şəxslər əsasən Putinə yaxınlığı ilə fərqləndirilmişdi. Əhmədov ABŞ-ın yanaşmasını qəbul etmədi, hətta ittiham tonunda danışmağa başladı.

Sonradan Qərb iş adamına rahatlıq vermədi. 2022-ci ilin mayında Hamburqda onun dəyəri 436 milyon dollar olan yaxtası əlindən alındı. Əhmədov son vaxtlar Avropa İttifaqına yaxtasının qaytarılması üçün çox ağız açıb. Bunun müsbət nəticəsi olmayıb.

Fərhad Əhmədovun həyat yoldaşı Tatyana ilə boşanma prosesi isə dillər əzbəridir. Prosesi hətta Böyük Britaniya tarixinin ən bahalı boşanması da adlandırırlar. Çünki azərbaycanlı milyarder rusiyalı xanıma 135 milyon funt sterlinq ödəməli olmuşdu. Hərçənd Tatyana xanım ondan dəfələrlə çox məbləğ qoparmaq istəyirdi. Sonra ailənin oğul övladı Teymurun atasının tərəfini tutması milyarderin işinə yaradı.

Hakim Qvinet Noulzun bir ifadəsi isə tarixdə qalacaq. O, Əhmədovları "məhkəmədə gördüyü ən bədbəxt ailə” adlandırmışdı.