“Youtube” platformasında cinayəti və cinayətkarlığı təbliğ edən videolar paylaşan gənc həbs edilib.

Publika.az-ın məlumatına görə, polis əməkdaşlarının keçirdiyi tədbirlərlə videoların bir qisminin Goranboy şəhər sakini, 20 yaşlı Uğur Qurbanov (ad soyad şərtidir) tərəfindən yerləşdirilməsi müəyyənləşib. Polis əməkdaşları onun yaşadığı ünvana gedərək şöbəyə dəvət ediblər. Bu zaman sərt formada etiraz edən gənc xuliqanlıq hərəkətlərinə yol verib. Daha sonra saxlanılaraq şöbəyə aparılan Uğur barəsində İXM-nin 510-cu (Xırda xuliqanlıq) və 535.1-ci (Polisin və ya hərbçinin qanuni tələbinə qəsdən tabe olmamaq) maddələri ilə protokol tərtib edilib.

İfadə verən gənc bildirib ki, videolarını paylaşdığı şəxs onun qohumudur: “Maqa” ləqəbli qohumumun ad gününün keçirilməsi ilə bağlı sosial şəbəkədə cinayətkar aləmə dair videolar paylaşdım. Hadisə vaxt əsəbi olmuşam, əməlimdən peşmanam”.

Goranboy Rayon Məhkəməsinin çıxardığı qərarla U.Qurbanova 10 sutka həbs cəzası verilib.