Dağıstanın gömrük xidmətinin əməkdaşları Rusiyadan Azərbaycana 300 min dəmiryol bileti keçirmək cəhdinin qarşısını alıb.

Virtualaz.org saytı xəbər verir ki, Dağıstan gömrüyünün mətbuat xidmətinin yaydığı məlumata əsasən Məhərrəmkənd sərhəd-keçid məntəqəsində sərhəddən gömrük bəyannaməsində göstərilməyən bilet blanklarını keçirmək istəyən Azərbaycan vətəndaşı saxlanılıb.

Məlumata görə, Rusiyadan Azərbaycana gələn, Azərbaycan vətəndaşının idarə etdiyi “İkarus” markalı avtobusa baxış zamanı sərnişinlərdən birinin yükündə 300 min blank aşkarlanıb.

Həmin şəxs biletlərin şəxsi istifadəsi üçün nəzərdə tutulduğunu deyib, ancaq gömrük əməkdaşları belə qənaətə gəliblər ki, blanklar kommersiya təyinatlıdır və bu səbəbdən gömrük bəyannaməsində göstərilməli idi.

“Qanunsuz daşınan biletlər müsadirə olunub və ekspertizaya göndərilib. Faktla bağlı araşdırma aparılır” - məlumatda deyilir.